Такі сцэнарый
Калі нехта думае, што для камфортнага жыцця чалавеку патрэбны нейкія пэўныя ўмовы, то памыляецца. Умовы, вядома, патрэбны, але гэта не пра фіранкі на акне, чыстую пасцель і яешню з беконам на сняданак. Бывае, што іншаму для шчасця не хапае несвабоды. Яму прасцей, калі нехта вырашае, як яму жыць, калі ўставаць і класціся, што есці, дзе працаваць.
Нядаўна судом Шумілінскага раёна пад старшынствам суддзі Алены Сініцкай з удзелам памочніка пракурора Наталлі Гаўрылюк была разгледжана справа па накіраванні грамадзяніна ў лячэбны працоўны прафілакторый. Для таго, каб атрымаць такую пуцёўку, чалавеку дастаткова тры разы быць папярэджаным аб магчымасці накіравання ў ЛПП, і пасля гэтага зноў здзейсніць адміністрацыйнае правапарушэнне ў стане алкагольнага ап’янення. Гэты герой менш як за год меў ажно сем такіх спраў і прызнаўся, што сам хоча ў ЛПП. Ён там быў ужо не адзін раз, ён умее сумленна працаваць, яму давяраюць адказныя заданні, на яго аўтарытэт там абапіраюцца. А ў Шуміліне, дзе на кожным кроку “сябры”, якія прапануюць выпіць, дзе няма пастаяннай працы, сям’і, яму некамфортна. Не хапае характару ці яшчэ нечага для таго, каб наладзіць жыццё так, каб яно ўпісвалася ў агульнапрынятыя нормы, і каб гэта адпавядала яго ўласным уяўленням пра жыццё, каб самому было добра.
Грамадзяніну было прысуджана 12 месяцаў “аздараўлення” ў ЛПП. Хочацца верыць, што ўжо немалады чалавек раптам усвядоміць, што ў яго ёсць усе магчымасці жыць прыстойна. Ён здаровы і працавіты, ён пакідае ўражанне сур’ёзнага чалавека (калі цвярозы), ён нават можа яшчэ стварыць сям’ю. Галоўнае – адрэдагаваць сцэнарый жыцця, а гэта вельмі проста – ён жа сам яго аўтар.
Дзень нараджэння адзначыў у камеры
Калі апісаная раней сітуацыя не пакінула нейкага прыкрага адчування, то наступная справа, разгледжаная А. А. Сініцкай у гэты ж дзень, не дала асаблівых спадзяванняў на тое, што грамадзянін яшчэ зможа прынесці сваім існаваннем хаця б нейкую карысць блізкім, грамадству, ды і самому сабе.
Грамадзяніна нядаўна камісавалі з ЛПП па стане здароўя. Такая сур’ёзная хвароба, як туберкулёз, не прымусіла яго перагледзець свой лад жыцця. Піць, нідзе не працаваць, крыўдзіць блізкіх – асноўныя складальнікі існавання гэтага чалавека, што ў поўнай меры перадае і яго знешняе аблічча.
У дадзеным канкрэтным выпадку грамадзянін быў п’яны з уважлівай, на яго погляд, прычыны – адзначаў дзень нараджэння. Але свята фінішавала ў міліцэйскай камеры. Як заўжды ў гэтым стане, ён стаў сварыцца з бацькамі, кідаўся ў бойку, зневажаў старых. Маці запужана ўжо ў такой ступені, што проста баіцца з’яўлення сына на парозе.
Па гэтай адміністрацыйнай справе дэбашыру прыйдзецца заплаціць штраф у 84 рублі. Калі такое паўторыцца, то яго чакае арышт, папярэдзіла суд-дзя.
Як бы ні паводзіў сябе чалавек, якую б дарогу жыцця ні абраў, лёс час ад часу абавязкова дае яму шанс паспрабаваць нанова, змяніць маршрут. Толькі ў гэты момант абавязкова трэба быць цвярозым.
Наталля ЧАРНІЧЭНКА