Фіктыўная інвентарызацыя
Шэраг парушэнняў заканадаўства пры распараджэнні маёмасцю выявіў КДК Віцебскай вобласці пры праверцы Аршанскай цэнтральнай раённай паліклінікі.
Некалькі год запар інвентарызацыя актываў праводзілася, можна сказаць, фіктыўна. І калі КДК патрабаваў правесці пазапланавую інвентарызацыю, выявілася звыш 70 няўлічаных аб’ектаў асноўных сродкаў агульным коштам 158 тыс. рублёў.
Установа не выконвала заканадаўства і пры здачы ў арэнду дзяржмаёмасці. Перадача ў арэнду рабілася без адпаведнага дазволу райвыканкама. Акрамя таго, праверкай зафіксаваны парушэнні заканадаўства ў сферы дзяржзакупак, парадку вя-дзення кнігі заўваг і прапаноў, пры эксплуатацыі будынкаў і збудаванняў, выкарыстанні пазабюджэтных сродкаў.
Па выніках праверкі забяспечана эканомія сродкаў бюджэту ў суме 96,8 тыс. руб. За дапушчаныя парушэнні да дысцыплінарнай адказнасці прыцягнута 20 работнікаў установы, да адміністрацыйнай – установа і 15 службовых асоб.
Далучэнне не па правілах
КДК Віцебскай вобласці падчас правядзення кантрольных мерапрыемстваў выявіў шматлікія парушэнні патрабаванняў заканадаўства пры арганізацыі і правядзенні ў 2013-2016 гг. работ па далучэнні дзяржаўных унітарных прадпрыемстваў да адкрытых акцыянерных таварыстваў у Аршанскім, Бешанковіцкім, Віцебскім, Пастаўскім, Полацкім, Ушацкім і Чашніцкім раёнах, а таксама ў горадзе Наваполацку.
Зараз згодна з указам Прэзідэнта Рэспублікі Беларусь ад 25.08.2016 №320 “Аб развіцці сельскагаспадарчай вытворчасці Віцебскай вобласці” на тэрыторыі вобласці праводзіцца работа па рэарганізацыі ААТ “Віцебскі мясакамбінат”, ААТ “Глыбоцкі камбікормавы завод”, ААТ “Аршанскі камбінат хлебапрадуктаў” і ААТ “Полацкі камбінат хлебапрадуктаў” шляхам далучэння да іх 37 сельгасарганізацый. У сувязі з гэтым для прыняцця мер папераджальнага характару КДК інфармаваў Віцебскі аблвыканкам пра выяўленыя парушэнні..
На перадапошнім месцы ў рэспубліцы
На калегіі КДК Віцебскай вобласці 20 снежня ў рэжыме відэаканферэнцсувязі з удзелам намесніка старшыні Віцебскага аблвыканкама А. Мацкевіча, начальніка галоўнага ўпраўлення гандлю і паслуг Віцебскага аблвыканкама і кіраўніцтва галоўнага ўпраўлення Міністэрства антыманапольнага рэгулявання і гандлю Рэспублікі Беларусь па Віцебскай вобласці, кіраўнікоў ДУ “Віцебскі абласны цэнтр гігіены, эпідэміялогіі і грамадскага здароўя” і Віцебскага абласнога саюза спажывецкіх таварыстваў, галоўных урачоў раённых і гарадскіх цэнтраў гігіены і эпідэміялогіі, старшыняў гар(рай)выканкамаў і намеснікаў па эканоміцы, а таксама іншых службовых асоб, у чые абавязкі ўваходзяць пытанні кантролю за дзейнасцю гандлю, кіраўнікоў буйных гандлёвых арганізацый разгледжана пытанне “Аб ацэнцы мер па выкананні суб’ектамі гаспадарання заканадаўства пры ажыццяўленні рознічнага гандлю, гандлёва-вытворчай дзейнасці і грамадскага харчавання, павелічэнню ўдзельнай вагі рэалізацыі айчынных тавараў у агульным аб’ёме продаж”.
Адзначана, што за 10 месяцаў 2016 года ў параўнанні з адпаведным перыядам мінулага года ў Віцебскай вобласці не забяспечана станоўчая дынаміка тэмпаў росту рознічнага тавараабароту (зніжаны да 93,7%, у тым ліку арганізацыямі спажывецкай кааперацыі – да 80,5%) і па дадзеным паказчыку вобласць знаходзіцца на перадапошнім месцы ў рэспубліцы.
Камітэтам вобласці адзначана нездавальняючая арганізацыя работы па насычэнні гандлёвай сеткі шырокім асартыментам айчынных тавараў, удзельная вага рэалізацыі якіх у апошнія гады зніжаецца.
Калегіяй КДК вобласці дадзены абавязковыя да выканання канкрэтныя даручэнні органам улады, арганізацыям і ведамствам для прыняцця мер рэагавання па прыцягненні вінаватых да адказнасці, паляпшэнні гандлёвага абслугоўвання насельніцтва, ажыццяўленні папераджальнага кантролю і недапушчэнні парушэнняў у далейшым.
Падрыхтавала Алена КАРПУШЭНКА.
Надрукавана ў №101 ад 27.12.2016 г.
