Міжнародны турнір на прызы “Белай Русі”
Прадстаўнічым выдаўся міжнародны турнір па валейболе сярод дзяўчат, прысвечаны памяці Героя Савецкага Саюза П. А. Акуцыёнка, на прызы раённай арганізацыі “Белая Русь”.
У госці да шумілінскіх валейбалістак прыехала маладзечанская каманда – адна з мацнейшых на Міншчыне. Пра ўзровень віцяблянак сведчыць тое, што яны выступаюць у рэспубліканскім першынстве “Дзіцяча-юнацкая ліга па валейболе”. Свой гульнявы стыль ў спартсменак з Расіі – каманды з Пскова. Каманды з Бешанковічаў, Паставаў, Міёраў – прынцыповыя сапернікі на любых абласных спаборніцтвах.
“Стала добрай традыцыяй, што наша арганізацыя падтрымлівае валейбольныя турніры”, – падкрэсліла старшыня раённай арганізацыі ГА “Белая Русь” Л. У. Маладзечкіна. Ларыса Уладзі-міраўна ўручыла членскія білеты арганізацыі кіраўніку спраў райвыканкама С. Д. Белагалову і маладым трэнерам ДзЮСШ – Ганне Белавусавай і Уладзіславу Вязіцкаму.
“Перад камандай ставіцца задача паказаць годную гульню, нагуляць камбінацыі, – адзначыла трэнер шумілінскай каманды Людміла Харкавец. – Нам важна добра падрыхтавацца да абласнога першынства”. І шумілінскія валейбалісткі не падвялі свайго трэнера. Дзяўчаты стараліся, змагаліся за кожны мяч. За гэту каманду не было сорамна нават у прайграных сустрэчах. Напачатку абыгралі пскоўскую каманду, адчулі ўпэўненасць у сваёй гульні Яна Мясаедава і Наталля Казьміна. Цікавы і адначасова цяжкі выдаўся матч “Шуміліна” – “Віцебск”. З першых хвілін ініцыятывай завалодалі віцяблянкі, але трэнер Людміла Харкавец змагла настроіць каманду – і другая партыя засталася за намі. Як старалі-ся на пляцоўцы Дар’я Галуза, Карына Ільінец і Кацярына Асташонак. Але ў трэцяй партыі сказаўся вопыт віцебскай каманды, якая і перамагла ў гульні.
Далей шумілінскія валейбалісткі выйгралі ў бешанковіцкай і пастаўскай каманд, прайгралі – міёрскай. Для таго, каб “зачапіцца” за прызавую тройку, нашай камандзе неабходна было узяць партыю ў моцнай маладзечанскай каманды. І зноў-такі з задачай мінімум шумілінскія дзяўчаты справіліся –змаглі вырваць перамогу ў другой партыі.
Пераможца турніру вызначаўся ў апошнім матчы, у якім “Віцебск” перамог “Маладзечна”.
Шумілінская каманда заняла трэцяе месца. Лепшы іграком турніру прызналі Анастасію Сівачэнка, а прыз глядацкіх сімпатый дастаўся Анастасіі Далжанковай.
Аляксандр ШЭДЗКО.
Надрукавана ў №7 ад 24.01.2017 г.
