Здарэнні. Крымінал
Пра здарэнні ў раёне расказаў намеснік начальніка РАУС Аляксандр Шумінскі.
Бойка з участковым
Узбуджана крымінальная справа супраць жыхаркі райцэнтра, якая ў нецвярозым стане накінулася на ўчастковага інспектара РАУС і нанесла яму некалькі ўдараў кулакамі ў твар. Прычына такой агрэсіі – адбіранне ў жанчыны дзяцей, якія з-за п’янак маці былі недагледжанымі. Цяпер дзеці жанчыны ў прытулку, а супраць яе пракуратурай раёна ўзбуджана крымінальная справа. Ёй пагражае арышт або абмежаванне волі да 5 гадоў, або пазбаўленне волі да 6 гадоў.
Бензапіла
У раённы аддзел унутраных спраў звярнуўся жыхар райцэнтра з заявай аб тым, што з альтанкі, якая знаходзіцца ля ягонага дома, прапала бензапіла. Як высветлілася, мужчына пакінуў яе там тыдзень таму і дакладна не ведае, калі быў здзейснены крадзеж. Па дадзеным факце ўзбуджана крымінальная справа.
Порах
Па месцы жыхарства аднаго з жыхароў вёскі Юрава знойдзены больш за сто грамаў бяздымнага пораху прамысловай вытворчасці. За незаконнае захоўванне выбуховага рэчыва ўзбуджана крымінальная справа. Парушальніку пагражаюць папраўчыя работы да 2 гадоў або арышт, або абмежаванне волі да 5 гадоў, або пазбаўленне волі да 7 гадоў.
Са зводак ДАІ
ДТЗ ля Сахоненак
Жыхар Полацкага раёна, які на аўтамабілі “Шкода-Актавіа” рухаўся па аўтадарозе Р-20 (ля Сахоненак) у бок Полацка, наехаў на веласіпедыста, які ехаў у спадарожным накірунку і паварочваў налева. У выніку дарожна-транспартнага здарэння пацярпелы веласіпедыст (жыхар райцэнтра) з цялеснымі пашкоджаннямі дастаўлены ў раённую бальніцу. Праводзіцца праверка, падрабязнасці здарэння высвятляюцца.
З півам
Супрацоўнікі ДАІ прыпынілі вадзіцеля “Шумілінскага райаграсэрвісу”, які нецвярозым сеў за руль ЗІЛа. Да таго, мужчына купіў сабе ў дарогу дзве двухлітровыя бутэлькі піва, адна з якіх была ўжо пустая. Вадзіцелю пагражае штраф і пазбаўленне правоў на тры гады.
Са Следчага камітэта
“Правучыў”
Як расказаў начальнік раённага аддзела Следчага камітэта Рэспублікі Беларусь Юрый Трошчанка, 17-гадовы жыхар аграгарадка Светласельскі пабіў мужчыну, які распіваў спіртныя напоі з яго маці. Мужчына атрымаў цяжкія цялесныя пашкоджанні, у тым ліку і пераломы рэбраў. Узбуджана крымінальная справа. Следчыя затрымалі хлопца, які потым быў адпушчаны пад падпіску аб нявыездзе.
Акумулятары
Каля вёскі Гаравыя з экскаватара, які належыць ПМС, невядомыя знялі два акумулятары. РАСК ўзбуджана крымінальная справа. Па факце неналежнага захоўвання тэхнікі да кіраўніцтва ПМС будуць прыняты меры рэагавання.
Падрыхтавалі Ларыса ЗАЙЦАВА і Аляксандр ШЭДЗЬКО.
Надрукавана ў №45 ад 13.06.2017 г.
