А вас, маладыя спецыялісты, мы запрашаем застацца

А вас, маладыя спецыялісты, мы запрашаем застацца
Маладыя кадры сёлетняга выпуску працягваюць прыбываць у раён. Дакладнай лічбы, колькі іх сёлета прыбудзе, пакуль няма. А вось лічба, колькі іх прыбыло за папярэднія тры гады, ёсць: амаль 300 чалавек. Як працуюць арганізацыі і прадпрыемствы раёна па адаптацыі маладых спецыялістаў і маладых рабочых, іх замацаванні на працоўных месцах – гэтыя пытанні былі абмеркаваны на чарговым пасяджэнні прэзідыума раённага Савета дэпутатаў.

“Не трэба гаварыць, наколькі актуальнае гэтае пытанне, – зазначыла старшыня райсавета Ірына Новікава. – Кадры па-ранейшаму вырашаюць усё: ад іх залежыць сацыяльна-эканамічнае становішча прадпрыемства, прыбытак, рэпутацыя, перспектывы развіцця і многае іншае. Нягледзячы на тое, што толькі за апошнія тры гады ў наш раён прыбыло амаль 300 маладых спецыялістаў, патрэбнасць у кадрах, асабліва ў сельскай гаспадарцы і гандлі, застаецца асабліва вострай”.
Пэўная работа па адаптацыі і замацаванні маладых спецыялістаў у раёне праводзіцца, аднак застаецца нявырашаным шэраг праблем і пытанняў як аб’ектыўнага, так і суб’ектыўнага характару. Ірына Мікалаеўна папрасіла дакладчыка начальніка аддзела арганізацыйна-кадравай работы райвыканкама Вячаслава Емяльянава больш дэталёва прааналізаваць, як пастаўлена работа ў арганізацыях і чаму з’язджае моладзь з раёна, а таксама ўнесці канкрэтныя прапановы для паляпшэння работы па замацаванні маладых спецыялістаў і маладых работнікаў у раёне.
Сярод асноўных прычын, якія негатыўна ўплываюць на замацаванасць маладых спецыялістаў, Вячаслаў Анатольевіч назваў размеркаванне без уліку пажаданняў спецыяліста, якасць прадастаўляемага жылля, невысокі ўзровень сацыяльных стандартаў у сельскай мясцовасці, расчараванне ў прафесіі, невысокі ўзровень заработнай платы. Сказваецца і блізкасць размяшчэння раёна з абласным цэнтрам, Полацкам, Наваполацкам. Таму ў першую чаргу, лічыць дакладчык, стаўку трэба рабіць на ўраджэнцаў раёна, бо тут верагоднасць іх замацавання самая высокая.
Трэба прызнаць і той факт, што ў пытанні замацавання маладых спецыялістаў недапрацоўвае кіраўніцтва арганізацый і ўстаноў, якое павінна быць зацікаўленым у новых свежых кадрах. Недастаткова вядзецца работа па выдзяленні мэтавых накіраванняў на вучобу, прафарыентацыйная работа ў старэйшых класах, не вельмі ахвотна выязджаюць кіраўнікі прадпрыемстваў на працэдуру размеркавання ў навучальныя ўстановы, каб “завербаваць” неабходных спецыялістаў.
У многіх арганізацыях патрабуе ўдасканалення сістэма маральнага і матэрыяльнага стымулявання.  Некаторымі кіраўнікамі недаацэнена школа настаўніцтва. Малады спецыяліст не прыходзіць гатовым, ён толькі тэарэтычна ўзброены, аднак часта гэтага не хапае яму ў рабоце. І яго, як кажуць, трэба “зляпіць”. Так што задача вопытных калег – дапамагчы моладзі набрацца вопыту, стаць больш упэўненымі, падняцца, як кажуць, на ногі.
Вопытам работы з маладымі спецыялістамі і сваім бачаннем праблемы падзяліліся дырэктар ПМК-70 Аляксей Крыўко і галоўны ўрач ЦРБ Канстанцін Баканаў.
Па абмеркаваным пытанні была прынята адпаведная пастанова.
*  *  *
На пасяджэнні было абмеркавана пытанне аб ходзе выканання рашэння Шумілінскага раённага Савета дэпутатаў ад 23 кастрычніка 2016 года №106 “Аб практыцы работы мясцовых органаў улады, спажывецкай кааперацыі па арганізацыі гандлёвага абслугоўвання насельніцтва”.
З асноўным дакладам выступіла в. а. начальніка аддзела эканомікі райвыканкама Галіна Калыхан. Заслухалі таксама справаздачу в. а. старшыні праўлення райспажыўтаварыства Наталлі Карпавай. Улічваючы той факт, што райспажыўтаварыства не выканала заданні па тэмпах росту рознічнага тавараабароту, па паляпшэнні якасці гандлёвага абслугоўвання, па павышэнні ўдзельнай вагі райпо ў агульным аб’ёме тавараабароту (райспажыўтаварыства за год зачыніла 13 гандлёвых аб’ектаў, іх удзельная вага ў сістэме раённага гандлю складае сёння толькі 16%), прынята рашэнне пакінуць пытанне на кантролі.
Алена КАРПУШЭНКА.
Надрукавана ў №63 ад 15.08.2017 г.