Вакзалу – 145 год
17 кастрычніка 1866 года Міністр шляхоў зносін Расійскай імперыі П. П. Мельнікаў даслаў імператару тэлеграму: “…У 9 гадзін 30 хвілін адкрыты рух на ўчастку Полацк-Віцебск…” Гэтую дату можна лічыць днём нараджэння шумілінскага вакзала, які ў той час называўся станцыяй Сіроціна (па самаму буйному мястэчку ў 12 вярстах ад станцыі).
Менавіта будаўніцтва чыгуначнай станцыі Сіроціна дало маленькай вёсачцы Шуміліна магчымасць ператварыцца ў цэнтр эканамічнага жыцця рэгіёна, стаць мястэчкам і пазней адміністрацыйным цэнтрам раёна.
Будынак вакзала – старэйшы будынак райцэнтра, які ўпрыгожвае Шуміліна, а комплекс станцыйных збудаванняў (вакзал, воданапорная вежа, склад) уяўляе сабой помнік прамысловай архітэктуры XIX стагоддзя.
З нагоды памятнай даты супрацоўнікі Шумілінскага гісторыка-краязнаўчага музея наладзілі выставу прама ў зале чакання вакзала. На выставе прадстаўлены копіі дакументаў, прысвечаных будаўніцтву Рыга-Арлоўскай чыгункі і станцыі, старых фотаздымкаў вакзала, паравозаў і іншай чыгуначнай тэхнікі, рабочых момантаў на чыгунцы. Прадстаўлены матэрыялы аб шумілінцах, якія прысвяцілі ўсё жыццё працы на чыгунцы.
Сяргей ПАЎЛАЎ.
