Дружыннікі берагуць спакой пасёлка
Сем гадоў пры Обальскім керамічным заводзе існуе добраахвотная дружына. Зараз у яе склад уваходзяць восем хлопцаў. Не па прымусу, а па сваёй добрай волі яны дапамагаюць міліцыі ў справе аховы правапарадку. Сярод маладых дружыннікаў – кантралёр-ахоўнік завода Артур Давыдоўскі. Хлопец вярнуўся на завод пасля арміі. Захапляецца спортам, пастаянна абараняе гонар завода на раённых турзлётах, спаборніцтвах па футболе і валейболе. І на рабоце паспявае, і на дзяжурствах добраахвотнай дружыны.
“Наша дружына існуе не дзеля “птушачкі”, мы працуем на сумленне, – гаворыць начальнік добраахвотнай дружыны Аляксандр Курачоў. – Па графіку дзяжурым у пасёлку, наведваем дыскатэкі, сочым за парадкам. Дапамагаем міліцыі і пазапланава. Бывае, што міліцыянерам тэрмінова патрэбна дапамога ў затрыманні злачынцы. Не адзін раз нашы хлопцы былі і панятымі”.
Участковаму РАУС па Обальскаму сельсавету Вячаславу Воранаву пашанцавала на надзейных памочнікаў. І да Артура Давыдоўскага, і да ўсіх астатніх можна звяртацца ў любы час. Зразумеюць сітуацыю, дапамогуць. За парадак у родным пасёлку маладыя дружыннікі ў адказе.
Лідзія РУМЯНЦАВА.
Надрукавана ў №86 ад 09.11.2011 г.