Справа за маладымі
6-7 лютага ў г. Горкі Магілёўскай вобласці ўпершыню прайшоў злёт маладых спецыялістаў, якія працуюць у арганізацыях аграпрамысловага комплексу. Арганізатарамі мерапрыемства выступілі Міністэрства сельскай гаспадаркі і харчавання Беларусі і рэспубліканская прафсаюзная арганізацыя работнікаў АПК.
Ад нашага раёна на злёце пабываў галоўны эканаміст КУСГП «Мішневічы» Уладзімір Груца.
Хлопец у гаспадарцы ўжо не навічок: працаваў тут па размеркаванні, адслужыў тэрміновую ваенную службу і зноў вярнуўся ў Мішневічы.
– Ці спадабаўся злёт? – пытаюся ва Уладзіміра.
– Прызнацца, думаў, што будуць звычайныя лекцыі ў БДСГА, дзе я нядаўна вучыўся, – шчыра кажа хлопец. – Але паездка вельмі спадабалася, бо праходзіла ўсё настолькі дынамічна і арганізавана, што і не заўважыў, як праляцеў час.
Размова вялася ў форме адкрытага дыялогу. І міністр сельскай гаспадаркі і харчавання Рэспублікі Беларусь Анатоль Хацько, і старшыня рэспубліканскага прафсаюза работнікаў АПК Мікалай Лабушаў, і старшыня Горацкага райвыканкама Аляксандр Бутараў гаварылі з намі, маладымі спецыялістамі, на роўных. Усе выступаючыя падкрэслівалі, што галіна сельскай гаспадаркі – асноўная ў эканоміцы нашай краіны. І працаваць тут павінны самыя надзейныя, вытрыманыя, вопытныя. Менавіта так называлі на мерапрыемстве маладых спецыялістаў. Ад гэтага адчувалася гордасць за абраную прафесію і значнасць таго, што робіш.
– У чым была асаблівасць мерапрыемства?
– Напэўна, у шматпланавасці. Вельмі спадабалася выстава-дэгустацыя прадукцыі прадпрыемстваў АПК, пасля якой пазнаёміліся з лепшымі праектамі рэспубліканскага конкурсу «Сто ідэй для Беларусі». Затым наведалі перапрацоўчыя прадпрыемствы Горацкага раёна. Многа цікавага пабачылі на малочнатаварным комплексе ААТ «Малочныя Горкі», на рыбагадоўчым індустрыяльным комплексе, на дыягнастычнай станцыі і вучэбнай ферме сельгасакадэміі.
– А што асабіста для сябе вы ўзялі са злёту?
– Шмат чаго. Адным словам і не скажаш. Па-першае, мне даспадобы была работа па групах, у якіх сабралі работнікаў адной спецыяльнасці. Нам расказвалі пра перадавыя тэхналогіі ў раслінаводстве і жывёлагадоўлі, тэхнічнае перааснашчэнне прадпрыемстваў, аплату працы ў сельскай гаспадарцы, змяненні і дапаўненні ў Працоўным кодэксе Рэспублікі Беларусь. Вялася гаворка пра правільнасць афармлення нарматыўна-прававой дакументацыі, пра даплату маладым спецыялістам. Адным словам, занатаваў палову блакнота. І вырашыў для сябе, што мне ёсць над чым працаваць і да чаго імкнуцца.
Ларыса ЗАЙЦАВА.
Апублікавана ў №11 ад 11.02.2020 г.
