Выхаванне душы
Таццяна Карташова, намеснік дырэктара па вучэбнай рабоце Обальскай СШ, узялася ўжо за трэці рэспубліканскі праект па духоўным выхаванні дзяцей. Ён называецца даволі складана – «Укараненне мадэлі фарміравання моўнай культуры дзяцей дашкольнага і школьнага ўзросту на праваслаўных традыцыях і каштоўнасцях беларускага народа ва ўмовах дзяржаўнага двухмоўя», а вучыць простым рэчам: чалавечнасці, дабрыні, мудрасці, спагадзе. Вучыць паважаць свае карані, культуру, мову, свой род, сваю сям’ю, свае святы.
З 2014 года ў школе вядуцца факультатыўныя заняткі «Асновы праваслаўнай культуры», на якіх па сутнасці фарміруюць маральныя каштоўнасці чалавека, выхоўваюць душу. Стаўся да людзей гэтак жа, як бы хацеў, каб ставіліся да цябе, – гэтае выслоўе стала дэвізам факультатыўных заняткаў, якія сёння наведваюць больш за 70 вучняў, а ў разавых мерапрыемствах па акрэсленай тэматыцы прымае ўдзел уся школа.
Да гэтай работы колішнюю выпускніцу Обальскай СШ падштурхоўвала само жыццё. Па характары сціплая, не надта ўпэўненая ў сабе, яна прызнаецца, што ўсім сваім перамогам над сабой і дасягненням яна абавязана Аляксандру Мікалаевічу Штокіну – гэта ён паклікаў на работу ў родную школу, падтрымаў і акрыліў, потым упэўніў, што яна зможа стаць дырэктарам дзіцячага прытулка, а пазней даверыў ёй работу намесніка дырэктара па вучэбнай рабоце. «Ён умеў расшыраць гарызонты, бачыць далей за іншых, смела браўся за новыя тэхналогіі, першым у раёне нацэліўся на інфарматызацыю. Аляксандр Мікалаевіч задаў такі тэмп і стыль ва ўсёй рабоце школы, за які мы і сёння трымаемся», – Таццяна Іосіфаўна са шчырай удзячнасцю расказвае пра свайго галоўнага ў жыцці настаўніка.
Хаця галоўны настаўнік – само жыццё, а Таццяна Іосіфаўна добрая вучаніца, якая стала добрай настаўніцай, выдатнай мамай для двух сыноў і дзвюх прыёмных дачок і любячай бабуляй для чатырохгадовага ўнука Кірыла.
Аліна ПЯТРОВА.
Апублікавана ў №76 ад 01.10.2021 г.
