Клопаты дачныя і радасці вясковыя
На мінулымі тыдні Дзень работы з насельніцтвам прайшоў на тэрыторыі Обальскага сельсавета. За тры дні, 12-14 мая, рабочыя групы, у склад якіх уваходзілі прадстаўнікі кіраўніцтва раёна і розных службаў, аб’ехалі ўсе вёскі сельсавета і сустрэліся з мясцовымі жыхарамі і дачнікамі, каб высветліць, якімі клопатамі яны жывуць.
Група на чале са старшынёй раённага Савета дэпутатаў Мікалаем Будневічам адпрацавала па маршруце Лявонава-Падоры-Шыліна-Ваўчкі-Клетчына-Пусташы-Чэрчыцы-Убоіна-Слудашы-Шашы.
Адразу адзначым высокую актыўнасць мясцовага насельніцтва, іх неабыякавыя адносіны да ўсяго, што адбываецца навокал. У кожнай вёсцы на сустрэчу з гасцямі збіралася багата людзей, дзяліліся і добрымі навінамі, і набалелым. Так што сходы праходзілі даволі актыўна. Вёўся жывы дыялог па ўсіх сферах жыццядзейнасці, а шляхі вырашэння праблем шукалі разам. Практычна ўсюды гаварылі пра грамадзянскія могілкі, іх стан, пра пад’язныя дарогі да іх – вяскоўцы хочуць, каб да Тройцы праблемныя пытанні былі зняты і яны маглі наведаць памерлых сваякоў.
Першым на маршруце было Лявонава. Старэйшына вёскі М. Л. Петручэня расказаў, чым сёння жывуць вяскоўцы, з якімі праблемамі сутыкаюцца. Мікалая Лявонцьевіча дапаўнялі жыхары. У прыватнасці, казалі пра небяспеку, якую нясуць некаторыя каналізацыйныя люкі. Жыхары Лявонава добра разумеюць, што і ад іх саміх залежыць, якой будзе іх родная вёска.
Традыцыйна вясной жыхары вёскі Падоры атрымліваюць праблему з дарогай. Сёлета дарожныя службы пачалі ўжо яе рамантаваць. Майстар ДРБУ-204 Аляксандр Уласаў запэўніў, што ў бліжэйшыя пару тыдняў з дарогай справяцца.
Обальшчыну, асабліва вёскі ўздоўж рэк Заходняя Дзвіна і Обаль, аблюбавалі дачнікі. Яны перабраліся ўжо на лета на свае сядзібы і паспелі адчуць усе прывабнасці вясковага побыту. Ціха, спакойна … У Ваўчках жывуць толькі дачнікі, з кожным годам у Чэрчыцах, Убоіне, Шашах усё больш набываюць дачы гараджане з Наваполацка і Полацка, Віцебска і Мінска. Ім падабаюцца гэтыя мясціны і хочацца, каб сучасныя даброты тут былі не меншымі, чым у гарадах. Так, напрыклад, у Ваўчках выказвалі незадаволенасць асартыментам аўтамагазінаў, маўляў, толькі адзін гатунак безгатункавай каўбасы можна купіць, ды ёсць і іншыя пытанні. Хаця ў Шыліне дзякавалі за асартымент крамы на колах, вяскоўцы казалі, што калі чаго няма, то ў наступны раз прывозяць.
Сустрэча ў вёсцы Чэрчыцы пачалася з падзякі ад жыхароў: «У мінулым годзе на падобным схо-дзе мы прасілі, каб на аўтобусным прыпынку зрабілі навес. Дзякуй за яго. Цяпер у любое надвор’е без праблем чакаем аўтобус». А вось сустрэчу ва Убоіне пачаў часова выконваючы абавязкі старшыні Обальскага сельвыканкама Сяргей Мураўёў: «Хачу вам падзякаваць, што вы ўсёй вёскай, усёй талакой напярэдадні Дня Перамогі добраўпарадкавалі брацкія могілкі!».
Мікалай Будневіч падкрэсліў, што ўсе ўзнятыя вяскоўцамі пытанні будуць на кантролі раённай улады.
Аляксандр ШЭДЗЬКО.
