«Дзякуй вам за працоўны подзвіг»
Самы вялікі наш гонар – людзі працы! Менавіта яны пішуць гісторыю сваёй малой радзімы. Імі ганарылася краіна і ўручала высокія ўзнагароды.
Дзякуючы ім наш раён і прадпрыемствы працвіталі. Сёння на Шуміліншчыне пра жываюць 8 ветэранаў працы, якія ў свой час былі ўзнагароджаны дзяржаўнымі ўзнагародамі за працоўныя заслугі. Напярэдадні дня ўтварэння Шумілінскага раёна кіраўніцтва наведала герояў, каб павіншаваць са святам, падзякаваць за працоўныя подзвігі, уручыць сімвалічныя падарункі з паштоўкамі. «Вы ўпісалі сваё імя ў летапіс нашай малой радзімы, прынеслі ёй гонар і павагу, сваёй працай і талентам унеслі неацэнны ўклад у матэрыяльны і інтэлектуальны патэнцыял раёна. Дзякуй вам за працоўны подзвіг! Шчасця, здароўя і даўгалецця, міру і дабра», – такія шчырыя словы гучалі ў гэты дзень у іх адрас.
Вось яны, нашы героі самаадданай і сумленнай працы: Міхаіл Максімавіч Рудоў з райцэнтра – уладальнік ордэнаў Кастрычніцкай Рэвалюцыі і Працоўнага Чырвонага Сцяга; Мікалай Антонавіч Варкулевіч з в. Бараноўскія – ордэна Працоўнага Чырвонага Сцяга і двух медалёў «За працоўныя заслугі». Валерый Аляксеевіч Грузневіч з в. Пабеда, Генадзь Аляксандравіч Ізепчанка з Сіроціна і Ефрасіння Іванаўна Казлоўская з Мішкавіч узнагароджаны ордэнам «Знак Пашаны». Высокай узнагароды – ордэна Працоўнага Чырвонага Сцяга – за працоўныя дасягненні былі ўдастоены Іван Ягоравіч Апоркін з Зямцоў і Яўген Іванавіч Сініцкі з райцэнтра. Адразу дзве высокія ўзнагароды – ордэны Працоўнай Славы 2-й і 3-й ступені – мае Карунны Вячаслаў Сцяпанавіч з Каравайніцы, вядомы ў раёне ў свой час механізатар калгаса імя Леніна.
Хочацца зазначыць, што некаторыя з кавалераў і сёння ў страі, прыносяць карысць роднай гаспадарцы і малой радзіме. Напрыклад, Валерый Аляксеевіч Грузневіч працуе інжынерам-механікам у «Шумілінскім райаграсэрвісе», мы засталі яго на працоўным месцы на машынным двары. Да ўсяго ён яшчэ і старэйшына вёскі, між іншым, як і Іван Ягоравіч Апоркін.
Парадавалі і астатнія ардэнаносцы: бадзёрыя, ініцыятыўныя, жыццялюбівыя і аптымістычныя. Такое адчуванне, што ў свой час разам з ордэнамі яны атрымалі і ўстаноўку на даўгалецце, пазітыўнае стаўленне да жыцця і людзей.
Алена КАРПУШЭНКА.