Галоўны ўлоў – шчасце сям’і
Некаторыя лічаць рыбалку выключна мужчынскім заняткам. І дарэмна! Азарт рыбнай лоўлі, свежае паветра – выдатная нагода сабрацца ўсім разам і адправіцца з вудамі на возера, лічыць сям’я Шніпавых з Добрына.
Рыбалка – іх агульнае сямейнае хобі. Бацькі – Аляксандр і Ганна – ловяць рыбу з дзяцінства. Да рыбалкі заахвоціліся і дочкі Алена, Вераніка і Маргарыта. Дзве старэйшыя дачкі ўжо дарослыя, а Маргарыта ходзіць у сёмы клас. Кажа, што першага карася самастойна злавіла ў пяць гадоў.
У сям’і Шніпавых рыба на стале ці ў халадзільніку ёсць заўсёды – сушаная, смажаная, вэнджаная, замарожаная. Яе прывозяць не толькі з мясцовых вадаёмаў, але і з азёр суседніх раёнаў.
З бабуляй, дзядулем, мамай і цёцямі ходзяць на рыбалку і самыя малодшанькія – пяцігадовы Улад і двухгадовы Юра (сыны Алены). Ніхто ў сям’і Шніпавых не ставіць за мэту злавіць самую вялікую рыбіну ў свеце, галоўнае – сам працэс, які прыносіць шмат пазітыўных эмоцый.
Лідзія РУМЯНЦАВА.
