Аператар па вырошчванні маладняку буйной рагатай жывёлы фермы Заобаль КУСГП «Мішневічы» Анжэла Сціхіна выйшла пераможцам прафсаюзных спаборніцтваў за верасень.
Анжэла Сціхіна працуе ў сельскай гаспадарцы больш за пятнаццаць гадоў, палову з якіх – аператарам па вырошчванні маладняку буйной рагатай жывёлы. Зараз даглядае групу цялят узростам ад трох месяцаў да года колькасцю ў семьдзесят восем галоў. Раздае сена, сянаж, камбікорм.
Ферма Заобаль не прыстасавана для меха-нізаванай раздачы кармоў. Таму іх уручную прыходзіцца грузіць на конскія калёсы, везці ў памяшканне і раздаваць цялятам. З пагрузкай Анжэле дапамагаюць мясцовыя жывёлаводы, якія працуюць на ферме.
Сярэднясутачныя прывагі цялят у групе Анжэлы Сціхінай за мінулы месяц склалі 652 грамы (+84 г да ўзроўню мінулага года). Добрыя прывагі – значыць укормленыя моцныя цяляты. Толькі са здаровага маладняку можна атрымаць добрых цялушак і раней іх асемяніць. Будзе і цялятка, і навацельная карова, якая пры добрым раздойванні парадуе малаком, разважае Анжэла Сціхіна.
З перамогай у працоўных спаборніцтвах аператара фермы Заобаль падарункамі і падзякай павіншавала старшыня райкама прафсаюза работнікаў аграпрамысловага комплексу Вольга Пусянкова.
Ларыса ЗАЙЦАВА.
