У сераду, 9 лістапада, Шумілінскую цэнтральную раённую бальніцу наведала старшыня Віцебскай абласной арганізацыі Беларускага таварыства Чырвонага Крыжа Галіна Жэланава. Наведванне Шуміліншчыны запланавана ў рамках рэалізацыі сумеснага пілотнага праекта «Вакцынацыя супраць COVID».
Патрэбныя падарункі ад Чырвонага Крыжа
«Акрамя таго, што падчас эпідэміі каранавірусу мы дапамагалі раёну ў дастаўцы грамадзян 60+ да месцаў вакцынацыі, праектам было прадугледжана аказанне лячэбным установам дапамогі ў набыцці рэабілітацыйных сродкаў, – расказала Галіна Пятроўна. – На працягу гэтага года мы закупілі для Шумілінскай цэнтральнай раённай бальніцы дзве інвалідныя каляскі. І сёння мы іх прывезлі».
Галіна Жэланава сустрэлася з калектывам райбальніцы, расказала пра дзейнасць Чырвонага Крыжа, рэалізуемы сумесны праект, работу з бежанцамі з Украіны. Старшыня абласной арганізацыі Беларускага таварыства Чырвонага Крыжа падзякавала шумілінскім медыкам за работу, падтрымку, за ўсё тое, што яны робяць для сваіх землякоў-пацыентаў і паабяцала надалей трымаць цесную сувязь з раёнам і аказваць пасільную дапамогу. Дзейнасць Чырвонага Крыжа накіравана ў першую чаргу на практычную рэалізацыю ідэй гуманізму, дабра і міласэрнасці, падкрэсліла Г.П. Жэланава.
Алена КАРПУШЭНКА.
