«Юны гвардзеец»: старт дадзены
11 лістапада ў сярэдняй школе №1 імя Героя Савецкага Саюза П. А. Акуцыёнка г. п. Шуміліна адбылося ўрачыстае адкрыццё першага ў раёне ваенна-патрыятычнага клуба «Юны гвардзеец».
Мерапрыемства пачалося на Алеі Славы ў гарадскім парку ля брацкіх могілак, дзе сабраліся члены клуба – вучні школы, педагогі, прадстаўнікі раённых грамадскіх арганізацый, ганаровыя госці. Тут, на воінскіх могілках, па-асабліваму гучаць словы аб трагічных і гераічных старонках гісторыі раёна, пра землякоў, якія ахвяравалі свае жыцці ў гады Вялікай Айчыннай вайны за наша мірнае неба, за свабоду і незалежнасць роднай краіны. Прысутныя ўшанавалі памяць загінуўшых воінаў хвілінай маўчання, усклалі кветкі да стэл з імёнамі герояў, на мемарыяльныя пліты на брацкіх могілках.
Прадоўжылася мерапрыемства ў актавай зале СШ №1. Старшыня раённага Савета дэпутатаў Мікалай Будневіч сказаў, што ва ўмовах гібрыднай вайны, якую Захад вядзе супраць нашай краіны, адкрыццё клуба будзе дапамагаць фарміраванню праўдзівага ўяўлення дзяцей і падлеткаў аб падзеях Вялікай Айчыннай вайны, будзе спрыяць патрыятычнаму выхаванню моладзі. Мікалай Аляксеевіч выказаў упэўненасць, што ўслед за першым клубам у СШ №1 падобныя фарміраванні з’явяцца і ў іншых школах раёна. «Будзьце годныя подзвіга героя, імя якога носіць ваша школа», – звярнуўся да вучняў Мікалай Будневіч.
Пра сувязь і пераемнасць пакаленняў, неабходнасць павышэння ўзроўню патрыятычнага выхавання гаварыў старшыня раённай арганізацыі ГА «Беларускі саюз афіцэраў» Валерый Жандараў, які ўручыў клубу грашовы сертыфікат на развіццё матэрыяльнай базы клуба «Юны гвардзеец» і абяцаў усебаковую падтрымку арганізацыі ў выхаваўчым працэсе.
На значэнні ваенна-патрыятычнага выхавання ў фарміраванні павагі да Узброеных Сіл, тэрміновай службы ў арміі, на прафарыентацыйнай рабоце для паступлення ў сілавыя навучальныя ўстановы засяродзіў увагу намеснік камандзіра вайсковай часці з Полацка Сяргей Літвінаў.
Кіраўнік клуба, настаўнік гісторыі Шумілінскай СШ №1 Сяргей Сахончык адзначыў сімвалічнасць заснавання клуба ў Год гістарычнай памяці, напярэдадні юбілейных гадоў вызвалення Беларусі і Вялікай Перамогі. За час падрыхтоўкі да юбілеяў члены клуба могуць зрабіць шмат карыснага ў справе захавання памяці пра савецкіх воінаў, фарміраванні патрыятызму сярод школьнікаў.
Вучні школы падрыхтавалі некалькі канцэртных нумароў патрыятычнага накірунку.
Сяргей ЕРМАЛАЕЎ.
