Жыць дапамагае хобі
На жаль, не ўсе людзі здаровыя. Некаторыя групу інваліднасці лічаць прысудам і заканчэннем жыцця. Жыхарка аг. Мікіціха Жанна Грабнёва не згодна з гэтым. Галоўнае – змяніць свае адносіны да сітуацыі і жыць на пазітыве, лічыць жанчына.
Раней Ж. А. Грабнёва працавала рабочай у мясцовым сельгаспрадпрыемстве, вось ужо больш за дваццаць гадоў мае другую групу інваліднасці. Успамінае, што ад такой навіны не кінулася ў роспач. «Мяне адразу маральна падтрымалі, – кажа Жанна Аркадзьеўна. – Прапанавалі наведваць гурткі ў Тэрытарыяльным цэнтры сацыяльнага абслугоўвання насельніцтва. Жыць дапамагае хобі».
Жанна з дзяцінства захаплялася вышыўкай, цяпер наведвае ў ТЦСАН гурткі «Умелыя рукі» і «Акно ў свет» і вельмі ўдзячна іх кіраўнікам за падтрымку, разуменне і клопат. Закупіла неабходную тканіну, рознакаляровыя ніткі, спецыяльныя іголкі, бісер – і ўзялася за справу: вышывае крыжыкам карціны, асабліва падабаюцца кветкі. Нядаўна стала рабіць яшчэ і падзелкі з паперы. Некалькі год запар удзельнічала ў абласных конкурсах «Зорка надзеі» і «Аранжавы настрой», дзе станавілася пераможцам.
Сёння ў яе калекцыі можна пабачыць мноства самаробных кветак, паштовак, шкатулак, сувеніраў. «Любімая справа мяне натхняе, стварае добры настрой, – кажа Жанна. – Таму кожны дзень, акрамя выхадных, езджу на рэйсавым аўтобусе на гурткі ў цэнтр».
3 снежня на раённым мерапрыемстве, прысвечаным Дню інвалідаў, будзе арганізавана персанальная выстава Жанны Грабнёвай. Для яе гэта вельмі важна.
Лідзія РУМЯНЦАВА.
