Ці ўсё мы ведаем пра Новы год, высвятлялі на «Навагоднім серпанціне» 16 снежня
Падчас правядзення апошніх «Гульняў розуму», што прайшлі восенню, Аліна Траццякова з каманды-пераможцы «Дзяўчаты» выказала прапанову, каб падобныя інтэлектуальныя гульні праводзіліся часцей. Прапанова пачутая. Напярэдадні навагодніх святаў раённы цэнтр культуры, райкам ГА БРСМ і раённае аб’яднанне прафсаюзаў правялі для працоўнай моладзі інтэлектуальную гульню «Навагодні серпанцін».
Інтэлектуальныя спаборніцтвы яўна прыйшліся даспадобы шумілінцам: за званне лепшых змагаліся 8 каманд, пераважна каманды арганізацый і прадпрыемстваў раёнаў, хаця былі і зборныя калектывы.
Першы этап – «Свая гульня». Нягледзячы на тое, што тэматыка пытанняў тычылася Новага года, камандам прыйшлося нялёгка. Кемлівасць, эрудыцыя, а часам інтуіцыя дапамагала ўдзельнікам знаходзіць правільныя адказы.
Удалы ход – у перапынку паміж раўндам быў арганізаваны музычны батл: вядучы называў пэўны колер ці слова (пераважна звязанае з Новым годам), а каманды спявалі радкі песні з гэтымі словамі. Атрымалася лёгкае музычнае шоў.
Усё вырашыў брэйн-рынг. Тут ужо былі больш складаныя пытанні. Ачкі атрымлівалі толькі тыя, хто быў дасведчаны ў розных сферах навагодніх і калядных святаў. Як вынік – адказы на некаторыя пытанні станавіліся сапраўдным адкрыццём.
Перамагла на гульні каманда «Камунальнік» УП ЖКГ. Усе ўдзельнікі атрымалі навагоднія падарункі.
Аляксандр ШЭДЗЬКО.
