Дробны дождж сяўбе не перашкода
Надвор’е сапсавалася, пахаладала. Але, як сцвярджаюць спецыялісты УП «Шумілінскі райаграсэрвіс», дробны дождж сяўбе не перашкода. Тым больш, што сельгаспрадпрыемства па тэмпах сяўбы яравых зерневых і зернебабовых другое ў раёне (пасля ААТ «Ляжні») – на раніцу ўчарашняга дня справіліся з 84,5% да патрэбнага.
Ва ўрочышчы Смалькі сустракаем Ігара Цялушкіна і Яўгена Цыганкова (на здымку). Механізатарскі дуэт працуе зладжана: Ігар на МТЗ з трохмятровым «Лемкенам» засявае за дзень да 13 гектараў зерневых, а Яўген падвозіць насенне. Дзеля гэтага пераабсталявалі бункер ад КЗРа, у які змяшчаецца каля чатырох тон зерня, прычапілі да МТЗ – зручна і надзейна.
Учора ва ўрочышчы Смалькі сеялі авёс гатунку «дэбют», які набылі ва УП «Віцебскнасентравы» і адвялі пад яго 80 гектараў. На іншых палетках працавалі Міхаіл Бібкін, Рыгор Кавалёў і Васіль Сазанаваец з плугамі. Галоўны аграном гаспадаркі Дзмітрый Лазука адзначыў, што ўсе механізатары сельгаспрадпрыемства надзейныя і руплівыя – з такімі справяцца з пасяўной своечасова. На гэтым тыдні зерневыя дасеяць, потым возьмуцца за кукурузу і яравы рапс
Ларыса ЗАЙЦАВА.
