Старт на здароўе і спорт
Учора, 5 чэрвеня, шумнымі дзіцячымі галасамі напоўнілася Шумілінская СДЮШАР. Установа адна з першых запрасіла хлопцаў і дзяўчат на летні адпачынак у спартыўна-аздараўленчы лагер «Старт» (у Шуміліна і Обалі).
«За першую змену, якая будзе доўжыцца да 24 чэрвеня, у нас адпачнуць 94 падлеткі: 56 дзяцей, якія займаюцца валейболам, і 38 – якія займаюцца грэка-рымскай барацьбой, – расказаў начальнік лагера Дзмітрый Ананьеў. – Найперш змена арыентавана на тое, каб падлеткі павысілі свае прафесійныя спартыўныя навыкі, аздаравіліся і набраліся эмоцый».
Па добрай традыцыі на летні час трэнеры-выкладчыкі «перакваліфікаваліся» ў выхавальнікаў, на першай змене працуюць Любоў Бабова, Людміла Харкавец, Юрый Пальвінскі, Аляксей Паршыкаў, Юрый Сцяпанаў і Пётр Ганушчанка. Дарослыя добра разумеюць, што іх выхаванцам патрэбна, каб яны дасягалі яшчэ больш высокіх дасягненняў. Багата будзе і забаўляльных мерапрыемстваў.
– Спартыўны лагер – гэта вялікі плюс для дзяцей, – зазначае Пётр Ганушчанка. – Штодзённыя двухразовыя трэніроўкі, узмоцненае харчаванне, дысцыпліна і адказнасць. Магу ўпэўнена сказаць, што менавіта праз такія спартыўныя лагеры фарміруецца дух пераможцы. Лета заўсёды па макс-муму неабходна выкарыстоўваць для будучых перамог на барцоўскім дыване.
Дарэчы, СДЮШАР сёлета арганізуе дзве змены. Другая пачнецца 31 ліпеня.
Аляксандр ШЭДЗЬКО.
