Па краіне крочыць рэспубліканская дабрачынная акцыя «Збяры партфель першакласніку». Да яе далучыліся работнікі Цэнтра па забеспячэнні дзейнасці бюджэтных арганізацый.
На мінулым тыдні яны завіталі да Наталлі Качан з Мішкавіч, якая выхоўвае шасцігадовую Уладзіславу і гадавалую Мілану.
Кіраўнік Цэнтра Ларыса Маладзечкіна, яе намеснік Вольга Галынчык і загадчык аддзела забеспячэння і пра-вавога рэгулявання Юлія Якуценка павіншавалі будучую першакласніцу. Падарылі дзяўчынцы тры пакеты канцылярскіх вырабаў і іншых неабходных прылад да школы (усё гэта работнікі цэнтра набылі за ўласныя грошы).
Уладзіслава радавалася падарункам, з цікаўнасцю разглядала рознакаляровыя фарбы, фламастары, алоўкі, папкі, сшыткі, пластылін. Дзяўчынка расказала, што хутчэй хоча пайсці ў школу, каб карыстацца ўсёй гэтай прыгажосцю, вучыцца пісаць, ляпіць, маляваць, майстраваць.
Ларыса ЗАЙЦАВА.