«Дэталёва разбірацца ў праблемах і шукаць выйсце»
6 званкоў паступіла на “прамую лінію”, якую у суботу, 2 снежня, правёў старшыня райвыканкама Сяргей Галынчык. Два званкі тычыліся адной тэмы – тарыфаў за электраацяпленне.
Тэму тарыфаў узнялі двое жыхароў вёскі Міка-лаева. Вяскоўцы сёлета правялі ў свае дамы электраацяпленне, атрымалі першыя жыроўкі – і шакіраваны выстаўленымі да аплаты су-мамі, якія ў шэсць разоў пераўзыходзяць чакаемыя.
Кіраўнік раёна пасля размовы з заяўнікамі патэлефанаваў у Міністэрства энергетыкі, расказаў сутнасць праблемы і папрасіў даць пісьмовы адказ-тлумачэнне па дадзеным пытанні.
Паступіў званок з аг. Мішневічы. Мужчына скардзіўся на слабы напор вады (такі, што нельга запусціць сістэму ацяплення) і прасіў дапамогі раённага кіраўніцтва ў вырашэнні пытання.
Жыхар райцэнтра папрасіў старшыню райвыканкама Сяргея Галынчыка разгледзець магчымасць прадастаўлення яму жылля, а жыхар Мішневіч – магчымасць падвозіць яго дзіця на школьным аўтобусе да навучальнай установы (між іншым, сям’я пражывае на цэнтральнай вуліцы населенага пункта і да школы – каля 1,8 км).
Патэлефанавала на «прамую лінію» жыхарка аграгарадка Кардон, мясцовы дэпутат, і звярнулася ад імя аднавяскоўцаў з просьбай адкарэкціраваць графік руху аўтобуса.
Трэба сустракацца з людзьмі і размаўляць з імі, дэталёва разбірацца ў праблемах, шукаць выйсце ва ўсіх інстанцыях, зазначыў старшыня райвыканкама Сяргей Галынчык па выніках «прамой лініі». Адказныя асобы і тэрміны выканання паступіўшых зваротаў вызначаны.
Усе заяўнікі атрымаюць адказы на свае пытанні.
Алена КАРПУШЭНКА.
