Пастукаўся прафсаюзны Дзед Мароз
Напярэдадні навагодніх святаў і Калядаў у дзверы вясковых дзяцей, якія маюць праблемы са здароўем і чые бацькі працуюць у сельскай гаспадарцы, пастукаўся прафсаюзны Дзед Мароз.
Ролю казачнага героя выконваў старшыня прафсаюзнай арганізацыі ТАА «Вежа» Юрый Афанасьеў, а падарункі прадаставіла старшыня райкама прафсаюза работнікаў АПК Вольга Пусянкова. Дзеці атрымалі ад прафсаюза таксама і сертыфікаты ў магазін «Ершык». Дзед Мароз быў вельмі гасцінным, уручыў ласункі ўсім дзецям з наведаных сем’яў: Карыне, Паліне і Вадзіму Чэкліным з Мікіціхі, Дзянісу Бачкову з Добрына, Савелію, Мікіту і Арцёму Сцяпанавым з Лескавіч, а таксама іх двухгадовай пляменніцы.
«Такога вясёлага свята ў нашым доме яшчэ не было, – падзялілася ўражаннямі Алена Сцяпанава. – Дзеці вельмі чакалі гасцей і рыхтаваліся. І былі дужа рады бачыць вясёлага Дзеда Мароза, з вялікім мяшком падарункаў. Атрымалі незабыўныя ўражанні на цэлы год. Дзякуй арганізатарам за казку і цудоўны настрой».
Ларыса ЗАЙЦАВА.
