У Обалі шыюць пасцельную бялізну
У Обалі наладжана новая вытворчасць: тут адкрыты цэх ТАА «Фабрытэкс» па пашыве пасцельнай бялізны.
Некалькі гадоў на другім паверсе будынка мясцовай пошты працаваў швейны цэх № 8 ААТ «Сцяг індустрыялізацыі», дзе шылі трыкатажныя вырабы, льняныя ручнікі і загатоўкі для мяккіх цацак. Восенню ён зачыніўся, а на яго месца прыйшло новае прадпрыемства – кіраўніцтва ТАА «Фабрытэкс», якое мае падобны цэх у Гарадку, вырашыла адкрыць сваю вытворчасць. Завезлі і ўстанавілі неабходнае абсталяванне, вопытныя швачкі, якія працавалі на ААТ «Сцяг iндустрыялізацыі», знайшлі тут сабе працоўнае месца. Але ж працоўных рук не хапае, кіраўніцтва гатова прыняць яшчэ 5-6 чалавек. Падчас нашага прыезду жанчыны шылі прасціны. Побач ляжалі рулоны з тканінай на розны густ: з яркім узорам, спакойнага колеру і для дзяцей – з казачнымі героямі.
«На новай вытворчасці мы працуем з 1 лістапада, – расказала майстар цэха Валянціна Ізафілава. – Звычайных прасцін нам трэба пашыць за дзень 90 штук на чалавека, на рызінцы – 50 штук. План выконваем і перавыконваем, бо швачкі ўсе вопытныя. Шыем камплекты пасцельнага – еўра, двухспальныя, аднаспальныя і дзіцячыя. За месяц пашылі больш за тры тысячы камплектаў. Раскроем займаецца Юля Рудак. Матэрыял – бязь, сацін, паркаль – нам прывозяць. Прадукцыя ідзе оптам на экспарт у Расійскую Федэрацыю».
«На будучае плануем пашырацца: устанавіць у суседнім свабодным памяшканні яшчэ больш за дзесяць швейных машын, – падзялілася планамі дырэктар ТАА «Фа-брытэкс» Наталля Бераснева. – Пры ўмове выканання даведзенага плана швачкі могуць разлічваць на заробак у памеры больш як тысячу рублёў за месяц. Так што запрашаем жанчын і мужчын да нас на работу. Калі не ўмееце шыць, навучым!»
У ТЭМУ. Як нам паведамілі спецыялісты аддзела эканомікі райвыканкама, у мінулым годзе ў раёне з’явілася пяць новых прадпрыемстваў, дзе адкрылі 13 рабочых месцаў. З пачатку 2024 года зарэгістраваны два прадпрыемствы: па пашыве мяккіх цацак і рознічным гандлі праз інтэрнэт, па вытворчасці тэкстыльных вырабаў. Усяго на двух прадпрыемствах мяркуюць адкрыць 25 новых рабочых месцаў.
Ларыса ЗАЙЦАВА.
