Пасёлак Обаль узнагароджаны вымпелам «За мужнасць і стойкасць у гады Вялікай Айчыннай вайны»
Святлана ІВАНОВА, ДЫРЭКТАР ШУМІЛІНСКАГА ГІСТОРЫКА-КРАЯЗНАЎЧАГА МУЗЕЯ:
– Да цяперашняга часу ў Беларусі былі ўзнагароджаны вымпеламі «За мужнасць і стойкасць у гады Вялікай Айчыннай вайны» 27 населеных пунктаў. Гэты знак адрознення быў заснаваны 6 кастрычніка 2004 года ўказам Прэзідэнта да 60-годдзя вызвалення рэспублікі ад нямецка-фашысцкіх захопнікаў. Кожнае з гэтых 27 месцаў стала сапраўднай цытадэллю мужнасці, у якой неверагодную адвагу праявілі не толькі байцы, але і мясцовыя жыхары.
Гарадскі пасёлак Обаль заслужана папоўніў спіс месцаў праяўлення масавага гераізму. У гады Вялікай Айчыннай вайны на яго тэрыторыі 605 дзён дзейнічала легендарная падпольная камсамольская арганізацыя «Юныя мсціўцы», адзіная ў сваім родзе не толькі ў Віцебскай вобласці, але і ў Беларусі, члены якой нараўне з дарослымі набліжалі Дзень Перамогі.
