Сямейны падрад Антонавых: бацька падвозіць, а сын засявае
Ва ўрочышчы з прыгожай назвай Жаўрукова гара КУСГП «Сіроцінскі» ў пачатку тыдня поўным ходам ішла пасяўная. На палетках працаваў сямейны падрад – Сяргей і Аляксандр Антонавы.
З краю поля стаяў МТЗ з падчэпленым бункерам для насення. «Вясна паклікала на работу, – усміхнуўся Сяргей Антонаў, выглядваючы з кабіны трактара. – Выйшаў на заслужаны адпачынак, але ж дзе тут утрываеш сядзець дома, калі просяць дапамагчы роднай гаспадарцы, якой аддаў амаль сорак гадоў! У свой час сам засяваў на СЗУ палеткі, і араў, і баранаваў. А цяпер вось са спакойнай душой эстафету перадаў сыну Аляксандру, а сам падвожу яму зерне. У яго сучасны вялікі пасяўны агрэгат – шасцімятровы».
Пакуль размаўляем, з нізіны на гару ўзнімаецца МТЗ з пасяўным агрэгатам. Аляксандр Антонаў у справе не навічок – засявае палеткі на працягу сямнаццаці гадоў. За дзень вядзе сяўбу на 4045 га.
На палетках бліжэй да Сіроціна вялася падрыхтоўка глебы – Анатоль Барадзёнак працаваў з плугамі, Віктар Пятроў і Уладзімір Салаўёў – з чызелямі, Вадзім Гарланаў – з баронамі. Праз некалькі дзён сямейны падрад Антонавых пераедзе на гэты ўчастак.
Па дарозе на палеткі сустракаем кіраўніка гаспадаркі Івана Карпенку, які расказаў: «Сёлета па плане трэба засеяць 730 гектараў зерневых і зернебабовых, засеялі больш за 500 га. Хутка прыступім да сяўбы рапсу і проса, пазней – да кукурузы. У гэтым годзе тры гектары адвялі пад кармавыя буракі, якія пойдуць на корм жывёле».
Ларыса ЗАЙЦАВА.
