Кафэ «Калібры» адкрылася!
Усе гэтага доўга чакалі! 17 мая ў гарадскім парку ўрачыста адкрылася кафэ «Калібры». З нагоды адкрыцця ля кафэ сабраліся шумілінцы – дарослыя і дзеці.
Намеснік старшыні райвыканкама Святлана Цімашэнка павіншавала ўсіх прысутных з адкрыццём пункта грамадскага харчавання, які вельмі патрэбны ў Шуміліне.
Тым часам скамарохі заклікалі людзей прайсці ў кафэ пачаставацца рознымі ласункамі – такі падарунак першым наведвальнікам зрабілі гаспадары ўстановы, якая названа ў гонар маленькай працавітай птушкі – «Калібры». «Наша кафэ для дарослых і дзяцей, – расказала дырэктар кафэ Кацярына Ізафілава. – Тут будуць марожанае, пірожнае, сок, выпечка. Мяркуем таксама гатаваць комплексныя абеды. А пакуль толькі вывучаем попыт наведвальнікаў, улічваем іх пажаданні. Стараемся, каб кожнаму госцю было ў нас камфортна і зручна».
Кафэ разлічана на 32 чалавекі, тут восем столікаў. Магчыма пра-вядзенне карпаратываў, невялікіх вяселляў, дзён нараджэнняў і іншых знакавых падзей. Дзеля зручнасці наведвальнікаў – тэлевізар, кандыцыянер, раздзявалка.
У кафэ адкрыты чатыры новыя рабочыя месцы: сюды працаўладкаваліся два повары і два афіцыянты-бармэны (адзін з іх – сын гаспадыні кафэ).
«Калібры» працуе з 10.00 да 22.00 па панядзелках-чацвяргах, з 10.00 да 24.00 на пятніцах – нядзелях.
Ларыса ЗАЙЦАВА.
