На абласны калядны баль – для натхнення
Чатыры пары ад нашага раёна прынялі ўдзел у абласным балі для пажылых грамадзян «Калядная сімфонія», які прайшоў у Віцебску ў абласной філармоніі і сабраў больш за 50 пар і ансамбляў з паўночнага рэгіёна. Мерапрыемства ладзілася ў рамках рэспубліканскай дабрачыннай акцыі «Ад усёй душы».
Нашы танцоры, якія прадстаўлялі ТЦСАН Шумілінскага раёна, на балі прадэманстравалі вальсавую кампазіцыю «Натхненне». Вальс закружыў не толькі равеснікаў з ліку прадстаўнікоў старэйшага пакалення, але і змешаныя пары.
«У падобным мерапрыемстве прымала ўдзел упершыню, хаця ў танцах я не навічок – з’яўляюся ўдзельніцай танцавальнага калектыву «Натхненне» ў мясцовым Доме культуры, якім кіруе харэограф Уладзімір Мулькоў. З ім і рэпеціравалі перад балем, – расказала абальчанка Лізавета Снапкова. – Мерапрыемства вельмі спадабалася. Была магчымасць і сябе паказаць, і на іншых паглядзець, пераняць вопыт. Праграму дапоўнілі артысты філармоніі, што яшчэ больш дадало святочнага настрою і пазітыўных эмоцый».
