«Першамай у асобах» – напярэдадні Свята працы ў Шуміліне прайшлі адкрыццё раённай Дошкі гонару і ўрачыстасці па ўшанаванні работнікаў і калектываў, якія па выніках работы 2024 года дасягнулі лепшых вынікаў.
На свята сабраліся перадавікі вытворчасці і іх сем’і, кіраўнікі прадпрыемстваў, прадстаўнікі прафсаюзных арганізацый. Урачыстасці пачаліся ў фае цэнтра культуры. Усіх прысутных павіншавала са святам намеснік старшыні райвыканкама Ірына Шалахава. Лідары раённых арганізацый галіновых прафсаюзаў узнагародзілі работнікаў, якія дасягнулі высокіх паказчыкаў у рабоце, ушанавалі ветэранаў працы, актывістаў прафсаюзнага руху.
Падчас цырымоніі ўзнагароджання лаўрэатаў раённай Дошкі гонару з прывітальным словам звярнуўся старшыня райвыканкама Сяргей Галынчык:
«Паважаныя жыхары Шумілінскага раёна. Віншую вас з надыходзячым Святам працы. Дзякуючы вашай добрасумленнай працы шумілінская зямля з кожным годам становіцца больш прыгожай. Развіццё эканомікі, сацыяльнай і іншых сфер – ваша заслуга, паважаныя землякі».
Кіраўнік раёна падзякаваў ветэранам працы, якія стварылі моцны фундамент для развіцця раёна, вобласці і краіны ў цэлым. Сяргей Галынчык уручыў дыпломы аб занясенні на раённую Дошку гонару 14 работнікам, а таксама 7 прадпрыемствам і арганізацыям.
Свята ўпрыгожыла выступленне Нацыянальнага акадэмічнага народнага хору Рэспублікі Беларусь імя Г. І. Цітовіча.
У фае разгарнуліся выставы Шумілінскага гісторыка-краязнаўчага музея, раённай бібліятэкі, выстава-продаж сувенірнай прадукцыі Дома рамёстваў, выстава малюнкаў навучэнцаў Шумілінскай дзіцячай школы мастацтваў.
