Тэрыторыя бяспекі. Лета. Жнівень. Патруль на варце бяспекі
Жнівень. Лета працягваецца. «Летні патруль» працягвае кантраляваць сітуацыю з бяспекай у месцах масавага адпачынку і купання грамадзян.
У чарговы рэйд шумілінскія ратавальнікі разам з актывістамі БРСМ адправіліся на Шумілінскае возера.
— Асноўнай прычынай гібелі людзей на водных акваторыях з’яўляецца парушэнне правілаў бяспечных паводзін. Знаходжанне ў стане алкагольнага ап’янення, плаванне ў забароненых месцах, няўменне плаваць, а таксама недастатковы нагляд дарослых за дзецьмі – фактары, якія, на жаль, прыводзяць да трагічных наступстваў, – нагадаў адпачываючым інспектар сектара прапаганды і ўзаемадзеяння з грамадскасцю РАНС Вадзім Півавараў. Дзецям таксама расказалі пра самыя відавочныя небяспекі лета: ваду і агонь, а таксама пра тое, што нельга знаходзіцца на вадаемах без суправаджэння дарослых. Актывісты БРСМ уручылі прафілактычныя буклеты і таксама правялі тлумачальную работу.
Удзельнікі рэспубліканскай акцыі «Летні патруль» спадзяюцца, што адпачываючыя прыслухаюцца да іх слоў, а канкрэтныя прыклады гібелі людзей на вадзе прымусяць задумацца і выконваць правілы бяспекі.
Падрыхтавала Алена КАРПУШЭНКА.
