Галоўнае – цёплыя зносіны і творчасць
У ТЦСАН адкрылася рэтракафэ «Васількі», дзе нават ёсць этнаграфічны куток.
Дырэктар цэнтра Таццяна Донюш адзначыла, што кафэ – месца сустрэч, майстар-класаў, цёплых зносін. Тут можна паслухаць музыку, патанцаваць і проста адпачыць. Арганізатарам і спонсарам мерапрыемства, на якое запрасілі жыхароў раёна, выступілі прадстаўнікі рэлігійнай арганізацыі «Беларуская каталіцкая рэлігійная місія “Карытас” Віцебскай епархіі». Яны арганізавалі выставу «Мае гады – маё багацце», прысвечаную актыўнаму даўгалеццю і прафілактыцы дэменцыі. За кубкам гарбаты падзяліліся парадамі па прафілактыцы дэменцыі і спосабамі падтрымання актыўнага ладу жыцця, правялі майстар-класы па развіцці памяці і мыслення.
«Праект «Падтрымка людзей з дэменцыяй і іх даглядаючых сваякоў у г. Віцебск і Віцебскай вобласці» накіраваны на паляпшэнне якасці жыцця хворых людзей, а таксама асоб, якія даглядаюць пажылых, – адзначыла спецыяліст па сувязях з грамадскасцю рэлігійнай арганізацыі Лаліта Арлоўская. – Мы дапамагаем людзям, якія апынуліся ў цяжкай жыццёвай сітуацыі, мнагадзетным сем’ям, сталым адзінока пражываючым, людзям з дэменцыяй і іх сваякам, якія даглядаюць хворых».
Парады для актыўнага даўгалецця:
- Сацыялізацыя. Варта прымаць удзел у грамадскім жыцці.
- Інтэлектуальная актыўнасць. Гэта можа быць як саманавучанне, так і чытанне кніг, разгадванне крыжаванак.
- Цікаўнасць. Яна ўзмацняе жаданне быць актыўным. Цікаўнасць гарантуе з’яўленне імпульсаў у галаўным мозгу і прымушае думаць і рухацца.
4. Творчасць. Творчы чалавек глядзіць удалечыню, бачыць і адкрывае для сябе нешта новае кожны дзень.
5. Міласэрнасць. Клопат пра іншых змяншае наступствы стрэсаў. Калі чалавек аказвае пасільную дапамогу слабейшым, то ён адчувае сваю каштоўнасць.
Ларыса КІСЯЛЁВА.
