Пажарны апавяшчальнік – ваш начны вартаўнік
У Віцебскай вобласці стартуе шырокамаштабная інфармацыйная кампанія на тэму эфектыўнасці і мэтазгоднасці ўстаноўкі аўтаномных пажарных апавяшчальнікаў (АПА). З 24 лістапада па 14 снежня жыхары пачуюць пра тое, як простая і невялікая прылада можа стаць сапраўдным анёлам-захавальнікам у доме.
Важкі аргумент
За дзесяць месяцаў бягучага года ў краіне дзякуючы аўтаномным пажарным апавяшчальнікам выратаваны 53 чалавекі, сярод іх 12 дзяцей. Летась — 93 чалавекі, уключаючы 21 дзіця. Гэта не сухая статыстыка, а лёсы, якія маглі абарвацца, калі б не своечасовы сігнал трывогі.
Што такое АПА?
Аўтаномны пажарны апавяшчальнік — гэта кампактная прылада, якая:
- рэагуе на дым,
- падае гучны сігнал,
- працуе ад батарэйкі і не патрабуе правадоў.
Ён заўсёды «на пасту» — мігатлівы чырвоны святлодыёд кажа пра тое, што прыбор спраўны і гатовы да работы.
Дзе ўстанавіць?
Дым падымаецца да столі, таму апавяшчальнік лепш мацаваць у цэнтры пакоя. Але калі ў вас нацяжная столь, ёсць альтэрнатыва: устаноўка на сцяне, на вышыні 10-30 см ад столі. Галоўнае — не ставіць яго ў куцеі побач з вокнамі ці кандыцыянерамі, дзе патокі паветра могуць адвесці дым.
Як апавяшчае пра небяспеку?
Пры выяўленні задымлення прыбор падае перарывісты гукавы сігнал з пастаянным свячэннем святлодыёда чырвонага колеру.
Каб спыніць падачу гукавога сігналу АПА, трэба ліквідаваць крыніцу задымлення і праветрыць памяшканне.
Як даглядаць?
- Чыстка аптычнай сістэмы — раз у год (або пасля фальшывага спрацоўвання).
- Замена батарэйкі «крона» – па сігнале кароткіх гукавых імпульсаў.
Чаму гэта важна?
АПА — гэта цішыня да трывогі і гучны голас пры небяспецы. Ён не перашкаджае жыць, але можа выратаваць жыццё.
Памятайце: пажар не чакае, апавяшчальнік таксама не чакае — ён рэагуе імгненна. Устанавіце яго ў кожным спальным пакоі – і ваш дом стане бяспечней.
У выпадку надзвычайнай сітуацыі тэлефануйце па нумарах 101 або 112.
Падрыхтавана па інфармацыі інспектара РАНС Вадзіма ПІВАВАРАВА.
