Дзе і калі бывае мабільны ФАП
Жыхарка аграгарадка Кардон патэлефанавала ў рэдакцыю і заўважыла, што ў іх перасоўны ФАП бывае толькі раз у месяц. Чаму так рэдка, бо ў некаторых населеных пунктах мабільны ФАП працуе кожны тыдзень?
За каментарыем мы звярнуліся ў Шумілінскую ЦРБ. Старшая медсястра Ала Баркова патлумачыла:
– Аграгарадок Кардон знаходзіцца ў зоне абслугоўвання Мікалаеўскай амбулаторыі ўрача агульнай практыкі, у якой ёсць поўны штат медработнікаў і легкавы аўтамабіль, на якім медыцынскія работнікі выязджаюць у населеныя пункты да пацыентаў. Таму перасоўны ФАП накіроўваецца туды толькі адзін раз у месяц, каб абслужыць аддаленыя вёскі. Гэта ж тычыцца Мішневіцкай, Светласельскай, Мікіціхінскай і Обальскай амбулаторый.
Калі на ФАПе ёсць пастаянны медработнік (гэта аграгарадкі Слабада, Крывое Сяло і вёска Язвіна), то перасоўны ФАП накіроўваецца раз на тыдзень, каб медработнікі маглі наведаць населеныя пункты ў зоне іх абслугоўвання.
Там, дзе на ФАПе няма пастаяннага работніка, графік работы мабільных ФАПаў складаецца так, што яны працуюць у зонах абслугоўвання гэтых ФАПаў два, а часам і тры разы на тыдзень.
Сяргей ЕРМАЛАЕЎ
