Пуцёўка – у працоўнае лета
Пуцёўку ў працоўнае лета-2025 для студатрадаў раёна ў аўторак, 3 чэрвеня, атрымала першы сакратар РК ГА БРСМ Вікторыя Бяляева.
Урачыстае адкрыццё трэцяга працоўнага семестра прайшло ў Віцебску на Плошчы Сцяга і Герба. Пуцёўкі раённым штабам уручыў намеснік старшыні аблвыканкама Вячаслаў Дурноў.
Сёлета ў вобласці плануюць працаўладкавацца больш за 7 тысяч хлопцаў і дзяўчат па розных напрамках дзейнасці. Будуць працаваць педагагічныя, будаўнічыя, сельскагаспадарчыя, сэрвісныя, медыцынскія, экалагічныя студатрады.
Асаблівым месцам «працоўнага лета‑2025» стане абласная маладзёжная будоўля на базе Наваполацкага рэгіянальнага комплексу па абыходжанні з цвёрдымі камунальнымі адходамі. Усяго за лета на аб’екце адпрацуе 60 чалавек з ліку студэнцкай моладзі.
Па словах раённага маладзёжнага лідара, у Шумілінскім раёне будуць працаваць пяць студатрадаў (гэта парадку паўсотні юнакоў і дзяўчат). Першы студатрад прыступіць да работы 9 чэрвеня ў Шумілінскай ПМК‑70.
Алена КАРПУШЭНКА
