Салому звозяць у сцірты
Не проста пераараць іржышча пасля ўборкі зерневых, а спачатку ўбраць з палеткаў салому, якая спатрэбіцца для жывёлагадоўчай галіны, – такая задача стаіць перад сельгаспрадпрыемствамі раёна.
У ААТ «Прыазёрны мір» актыўна ідзе сціртаванне саломы. Сцірты пакладзены ўжо ў Маркаве і Пісараве. За гэтай работай ва ўрочышчы Плюшчаўка мы заспелі механізатара Яўгена Мацака. На МТЗ‑8 з франтальным пагрузчыкам КУН‑08, да якога прымацаваны вілы, Яўген спрытна падхопліваў з прычэпа цюкі саломы і вёз іх да сцірты.
«Адзін цюк важыць 450‑500 кілаграмаў, – кажа Яўген. – Гэта аўсяная салома – самая карысная для жывёлы. Яе прывезлі сюды з далёкіх участкаў. За дзень сціртую па 80‑120 рулонаў. Спачатку на высокім месцы непадалёк ад дарогі (каб можна было праехаць і ў снегапады) фармірую шырокую аснову, а потым складваю на іх цюкі пад невялікім вуглом і звужаючы ўверсе. Так салома добра праветрываецца. Самыя вялікія сцірты ў гаспадарцы налічваюць да 300 рулонаў».
Па словах кіраўніцтва «Прыазёрнага міру», у гаспадарцы нарыхтавалі больш за 600 тон саломы. Салома ідзе не толькі на падсцілку, гэта яшчэ добры грубы корм для жывёлы.
Ларыса ЗАЙЦВА.
