Паважаныя работнікі і ветэраны паштовай сувязі!
Раённы выканаўчы камітэт, раённы Савет дэпутатаў шчыра віншуюць вас з прафесійным святам – Сусветным днём пошты.
Ваша праца вельмі патрэбна людзям, у любую пару года, у снег і дождж, вы несяце ім вестачкі ад родных і блізкіх, дастаўляеце ў дамы газеты і часопісы. Кожны дзень жыхары нашага раёна адпраўляюць і атрымліваюць тэлеграмы, пісьмы, бандэролі, пасылкі, карыстаюцца іншымі паслугамі пошты. Сёння вы для многіх людзей, асабліва сталага ўзросту, з’яўляецеся добрымі памочнікамі ў зносінах з навакольным светам.
Са святам! Няхай весткі, якія вы прыносіце людзям, будуць толькі радаснымі! Няхай вам заўсёды ўсміхаецца шчаслівы лёс і дорыць моцнае здароўе і даўгалецце. Шчасця і дабрабыту вам і вашым сем’ям!
Пад дэвізам “Хуткасць. Надзейнасць. Даступнасць”
9 кастрычніка 1874 года была падпісана Бернская канвенцыя, якая стала падставай для стварэння Сусветнага паштовага саюза – міжнароднай арганізацыі, якая сёння аб’ядноўвае пошты 192 краін. Менавіта ў гэты дзень пятнаццаць гадоў таму было створана рэспубліканскае ўнітарнае прадпрыемства “Белпошта”.
Шумілінскі раённы вузел паштовай сувязі Віцебскага філіяла РУП “Белпошта” мае 24 аддзяленні (3 гарадскія, 20 сельскіх, 1 перасоўнае). Работнікі пошты абслугоўваюць 252 населеныя пункты. Ад работы паштальёнаў, аператараў, сарціроўшчыкаў залежыць і якасць прадастаўляемых паслуг, на што сёлета, у Год якасці, звяртаецца асаблівая ўвага.
Шмат гадоў працуюць ў аддзяленнях сувязі сапраўдныя прафесіяналы паштальёны Т. Я. Шавяка і Т. С. Савіна (АПС Шуміліна-2), Г. А. Маркіянава (АПС Лявонава), А. У. Семянюга і Г. М. Бейнер (АПС Мікалаёва), Т. А. Сіпко і В. У. Ермаловіч (АПС Кардон), Т. П. Маскалькова (АПС Шуміліна-1).
Заўжды гатовыя прыйсці на дапамогу кліенту, адказаць на пытанні, ветліва і хутка абслужыць начальнікі паштовых аддзяленняў А. І. Шэдзько (Лявонава), М. С. Багрэц (Мікалаёва), Л. К. Бужынская (Кардон), Г. У. Кісялевіч (Светласельскі), А. В. Нікіценка (Язвіна).
Працягвае традыцыі прадпрыемства моладзь: аператар паштовай сувязі А. С. Кісялёва і намеснік начальніка АПС Т. С. Гайлова (Шуміліна-2), начальнік АПС А. Г. Будневіч і аператар А. Я. Зайцава (Обаль), аператар РВПС Н. У. Асташонак.
Аддзяленні сувязі раёна забяспечваюць вялікі спектр паштовых паслуг (70,4% ад агульнага аб’ёму паслуг) у адпаведнасці з дзяржаўнымі сацыяльнымі стандартамі, аказваюць няпрофільныя паслугі – продаж тавараў паўсядзённага попыту, прымаюць плату за камунальныя паслугі, паслугі аператараў мабільнай сувязі, па банкаўскіх крэдытах і іншае. Штомесяц паштальёны абслугоўваюць 4890 пенсіянераў, якім дастаўляюць не толькі пенсіі і газеты, але і тавары першай неабходнасці. Пошта забяспечвае насельніцтва газетамі і часопісамі. У падпісныя каталогі ўключана больш за 10 тысяч выданняў, у тым ліку 1300 найменняў газет, 7700 – часопісаў. Развіваецца інтэрнэт-падпіска на друкаваныя СМІ. Агульны тыраж друкаваных СМІ па падпісцы ў раёне складае на 1.01.2010 года 18932 экзэмляраў.
У 14 паштовых аддзяленнях у сельскай мясцовасці аказваюцца банкаўскія паслугі.
Сучасныя інфармацыйныя тэхналогіі актыўна ўкараняюцца ў сістэме паштовай сувязі. Пошта – буйнейшы дылер усіх аператараў мабільнай сувязі. 11 паштовых аддзяленняў абслугоўваюць трымальнікаў банкаўскіх пластыкавых картак. З 2006 года працуе “Сервер аплаты паслуг”, які дазваляе кліентам праводзіць аплату паслуг у рэжыме рэальнага часу, ажыццяўляць міжрэгіянальныя плацяжы. Ва ўсіх аддзяленнях сувязі ёсць магчымасць весці прыём сучасных відаў паштовых адпраўленняў: “Экспрэс”, “ЕМС”, гібрыднай пошты, тэрміновай пошты.
Беларуская пошта знаходзіцца ў пастаянным развіцці, удасканальвае паслугі, распрацоўвае новыя, штодзённа пацвярджаючы свой дэвіз “Хуткасць. Надзейнасць. Даступнасць”.
К. Г. Анацка, начальнік раённага вузла паштовай сувязі Віцебскага філіяла РУП “Белпошта”