Гультай
Жыхар в. Свярдлы быў асуджаны за крадзеж да 1 года 2 месяцаў папраўчых работ. З яго вылічвалі 15% заробку ў даход дзяржавы. Аднак мужчына працаваў нядоўга. За ўхіленне ад адбыцця пакарання супраць яго ўзбуджана крымінальная справа.
Ухілялася ад пакарання
Непрацуючая жыхарка Язвіна два гады таму была асуджана да пакарання ў выглядзе абмежавання волі без накіравання ў папраўчую ўстанову адкрытага тыпу. Але жанчына не выконвала патрабаванні пакарання: на работу, куды ёй дапамаглі працаўладкавацца, хадзіла праз дзень. Узбуджана крымінальная справа.
Ванны
У міліцыю звярнулася пенсіянерка з Віцебска, якая паведаміла, што на тэрыторыі садаводчага таварыства “Дачнае”, што ва Ужляціне, пабывалі злодзеі. У прыватнасці, укралі са двара дома пацярпелай дзве чыгунныя ванны. Па гарачых слядах злачынства было раскрыта: яго здзейсніў ураджэнец Віцебска без вызначанага месца жыхарства. Мужчына заключаны пад варту, супраць яго ўзбуджана крымінальная справа.
Рамы
Пацярпела жыхарка Шуміліна: з яе дачнага дома, што ў Лескавічах, выставілі дзве аконныя рамы. Урон, нанесены пацярпелай, складае больш за мільён рублёў. Узбуджана крымінальная справа.
П’яны на матацыкле
Жыхара Шуміліна, які ехаў на матацыкле, супрацоўнікі дарожна-патрульнай службы затрымалі ў пасёлку Кіраўскі Віцебскага раёна. Кіроўца быў у стане алкагольнага ап’янення, ехаў на незарэгістраваным матацыкле, не меў з сабой дакументаў. Мужчыну пагражае пазбаўленне вадзіцельскіх правоў тэрмінам на тры гады і штраф больш за 15 мільёнаў рублёў.
…і на машыне
Яшчэ аднаго нецвярозага жыхара Шуміліна супрацоўнікі ДПС затрымалі на вуліцы Сіпко. Мужчына ехаў на аўтамабілі “Фольксваген-Гольф”. Вадзіцель вызваны на адміністрацыйную камісію ДАІ, машына знаходзіцца на штрафной стаянцы РАУС. Гаспадару “Фольксвагена” пагражае штраф да ста базавых велічынь і пазбаўленне вадзіцельскіх правоў на тры гады.
Заднім ходам
Жыхар Лескавіч, рухаючыся заднім ходам на аўтамабілі “Міцубісі-Паджэры”, наехаў на “Фіят”, які належаў індывідуальнаму прадпрымальніку з Наваполацка. Машыны пашкоджаны. Жыхару Лескавіч пагражае штраф да пяці базавых велічынь.
На хуткасці
Непрацуючага жыхара Шуміліна супрацоўнікі ДАІ затрымалі на аўтадарозе, якая мяжуе з Латвіяй: мужчына перавысіў дапушчальную хуткасць руху на 22 кіламетры ў гадзіну. Прычым, парушыў закон паўторна на працягу года. Вадзіцелю пагражае штраф да 15 базавых велічынь або пазбаўленне вадзіцельскіх правоў да аднаго года.
Па матэрыялах РАУС
падрыхтавала Людміла ЗУЙКОВА.