Апусцелыя будынкі – на аўкцыён
У памяці той час, калі ў вясковых школах, і не толькі ў тых, што былі на цэнтральных сядзібах гаспадарак, вучняў было на два-тры паралельныя класы. Сёння здаецца, што той багатай на вясковую дзятву пары наогул і не было, сёння сітуацыя з напаўняльнасцю класаў многіх вясковых школ – горш не прыдумаеш.
Вызваляюцца школьныя будынкі, аціхаюць дзіцячыя галасы ў некаторых садках. Куды дзяваць гэтыя вызваленыя памяшканні? Праблема не сённяшняга дня, яна ўзнікла ўчора ці нават раней. Што ж чакае гэтыя асірацелыя будынкі?
З гэтымі, і не толькі гэтымі пытаннямі мы звярнуліся да начальніка аддзела адукацыі, спорту і турызму райвыканкама П. У. Спірыдонава.
– Будынкі, якія вызваліліся, праз паўгода мы выставім на аўкцыённы продаж, – адказаў Пётр Уладзіміравіч. – Можа, адгукнецца хто, можа, хто захоча адкрыць сваю справу на вёсцы, заняцца, напрыклад, аграэкатурызмам.
– Найбольшую цікавасць для гэтага могуць, хутчэй за ўсё, выклікаць будынкі былой Суравенскай школы…
– Вядома, хаця і не ў адных Сураўнях у нас маляўнічыя мясціны, не менш гожыя над Дзвіной – у Полькавічах, дзе чакае купцоў былы дзіцячы сад. Гэта двухпавярховы будынак, тут свая кацельня, водаправод, каналізацыя. Усё ёсць. На многія камунальныя даброты багатыя будынкі былой Суравенскай пачатковай школы. Тут і двухпавярховая мураванка, і спартыўная зала, і асобны драўляны будынак, абкладзены цэглай. Дарэчы, у муры і ў спартыўнай зале, які недалёка, цэнтральнае ацяпленне.
– Невымерна вялікія будынкі для жменькі вучняў у Сіроцінскай, Амбросавіцкай, Башнёўскай, Язвінскай школах…
– З гэтымі школамі пакуль пачакаем. Была думка зрабіць пачатковую з Язвінскай базавай, але пасля рашылі: хутка ў вёску прыйдзе газ, можа, і з’явяцца маладыя сем’і. А вось у Лявонаве не будзе дзіцячага сада. Тут застаюцца незапатрабаванымі таксама тры будынкі: сталовай, былой майстэрні і будынак садка. Не будзем губляць надзеі на тое, што “выплыве” купец і для будынкаў у гэтай вёсцы.
А наогул з гадамі “асірацелых” будынкаў школ і садоў будзе, як гэта ні шкада, усё больш. Засмучае такі факт, аднак гэтую тэндэнцыю ўжо наўрад ці спыніш.
Мікалай БАРЫСАЎ.
Сумна гэта ўсё.
а кольки яны будуць каштавать,?
Даведайцеся ў аддзеле адукацыі