У міжнародным конкурсе “Музычны вернісаж” шумілінскія музыканты атрымалі чатыры ўзнагароды

Скорынавым скарыўся музычны алімп
Не стамляюцца радаваць землякоў сваімі поспехамі шумілінскія цымбалісты. Выхаванцы Алены Скорынавай на гэты раз вызначыліся ў міжнародным конкурсе “Музычны вернісаж”.
Конкурс для нашых музыкантаў выдаўся па-сапраўднаму зорным: адразу чатыры перамогі і чатыры дыпломы.
У намінацыі “Народныя інструменты (цымбалы)” званне лаўрэата II ступені і дыплом атрымала Ксенія Храмцова, званне лаўрэата I ступені ў Лізаветы Дземінёвай. Абедзвюх дзяўчынак рыхтавала да конкурсу іх выкладчык Алена Скорынава, а таксама канцэртмайстар Ганна Красоўская.
А перамогу і гран-пры ў гэтай жа намінацыі атрымала Вольга Скорынава – выпускніца Шумілінскай школы мастацтваў,  якая зараз працягвае адукацыю ў Віцебскім музычным каледжы імя Салярцінскага. Зараз у Олі другія настаўнікі, а першым і галоўным была (ды і застаецца) яе мама – Алена Ігараўна.
У намінацыі “Інструментальныя ансамблі” званне лаўрэата II ступені заваяваў сямейны ансамбль Скорынавых “Чароўныя музыкі”. Мастацкі кіраўнік ансамбля Алена Скорынава разам са старэйшай дачкой Вольгай ігралі на цымбалах, канцэртмайстар Віктар Скорынаў з сынам Васілём – на баянах, а самая маленькая ўдзельніца сямейнага ансамбля Маша дадала “Чароўным музыкам” каларыту з дапамогай ударных інструментаў. Атрымалася цудоўна, і Скорынавым скарыўся музычны алімп. З чым мы іх і ўсіх пераможцаў шчыра віншуем!
Адзначым, што конкурс “Музычны вернісаж” праводзіць асацыяцыя педагогаў-музыкантаў горада Магнітагорска і Чалябінскай вобласці пад дэвізам “Адораныя дзеці – наша будучае”. Як шумілінцы трапілі туды? Дапамог інтэрнэт, бо конкурс праводзіцца па відэзапісах. Але гэтая акалічнасць ніколькі не змяншае заслугу нашых музыкантаў, наадварот, быць лепшымі сярод дзвюх тысяч удзельнікаў – гэта поспех. І салідны падарунак Шумілінскай школе мастацтваў да адкрыцця яе новага будынка.
Аліна ПЯТРОВА.