Лукашэнка заклікае ІП падключацца да мадэрнізацыі айчыннага легпрама
Аляксандр Лукашэнка прапанаваў мадэрнізаваць лёгкую прамысловасць з дапамогай ІП, у якіх ёсць для гэтага ўсё неабходнае. «Добры ж варыянт — вялікая колькасць прадпрыемстваў гарбарных, абутковых, швейных, па вытворчасці тканін. Там патрэбны і інвестыцыі, і самае галоўнае — мазгі і паваротлівасць», — сказаў кіраўнік дзяржавы.
Падводзячы пазней вынікі нарады па пытаннях рэгулявання і развіцця асобных відаў прадпрымальніцкай дзейнасці, Прэзідэнт заклікаў прадпрымальнікаў пераходзіць на цывілізаваныя формы работы, не чакаючы 1 студзеня 2016 года, калі ўжо нельга будзе прадаваць тавары легпрама без дакументаў, што пацвярджаюць іх набыццё. «Калі мы хочам мець цывілізаваную дзяржаву, мы ўсё роўна прыйдзем да гэтага. Ненармальна, калі ў сумках, сетках, баулах возяць тавар, невядома адкуль і на яго няма дакументаў. Таму рана ці позна ўсё роўна да гэтага прыйдзем. Пачынайце цяпер гэта рабіць, не чакайце да 1 студзеня», — сказаў Аляксандр Лукашэнка, звяртаючыся да прадпрымальнікаў.
«Перспектыва адна. Хочаце быць бізнесменамі — пераходзьце на нармальны стыль работы», — падкрэсліў кіраўнік дзяржавы.
Прэзідэнт звярнуў увагу, што падтрымку малому і сярэдняму бізнесу гатовы аказаць Банк развіцця, дамоўленасці ў гэтым напрамку дасягнуты і з Еўрапейскім банкам рэканструкцыі і развіцця, Сусветным банкам. Аляксандр Лукашэнка заклікаў прадпрымальнікаў аб’яднацца і ствараць малыя і сярэднія прадпрыемствы, якія будуць працаваць празрыста. Ён гарантаваў бізнесу падтрымку і абарону ва ўмовах функцыянавання Мытнага саюза.
Лукашэнка патрабуе ўлічваць маральны фактар пры вырашэнні праблем прадпрымальнікаў
Аб гэтым Аляксандр Лукашэнка заявіў на нарадзе па пытаннях рэгулявання і развіцця асобных відаў прадпрымальніцкай дзейнасці.
«Галоўнае — чалавечы фактар, — падкрэсліў кіраўнік дзяржавы. — Людзей крыўдзіць нельга. Трэба зрабіць тонка і акуратна, каб людзі не пакрыўдзіліся. Бо за кожным — сям’я. Гэта маральны фактар, і яго трэба ставіць на першае месца».
Разам з гэтым кіраўнік дзяржавы выказаў упэўненасць, што прадпрымальнікам трэба «выходзіць на нармальны, празрысты бізнес, паставіўшы сябе ў аднолькавыя ўмовы з іншымі. А галоўнае — каб яны працавалі сумесна з беларускай лёгкай прамысловасцю, рэалізуючы айчынныя тавары».
«Калі мы гаворым аб бізнесе, то галоўнае — канкурэнцыя ў роўных умовах, незалежна ад форм уласнасці», — лічыць кіраўнік дзяржавы.
А цяпер сітуацыя склалася такім чынам, што частка прадпрымальнікаў працуе празрыста, а частка — не прымае новых умоў дзейнасці, прадугледжаных заканадаўствам.
Прэзідэнт таксама перасцярог прадпрымальнікаў ад звязвання іх інтарэсаў з палітыкай.
Лукашэнка: пры ўрэгуляванні сітуацыі ў прадпрымальніцкім асяроддзі неабходна ўлічваць інтарэсы ўсіх бакоў
Кіраўнік дзяржавы падкрэсліў, што ўрад у прысутнасці прадпрымальнікаў, іх прадстаўнікоў павінен адказаць на шэраг пытанняў. «Па-першае, што прапануецца для ўрэгулявання сітуацыі ў прадпрымальніцкім асяроддзі? Па-другое, як будуць улічаны інтарэсы ўсіх бакоў — спажыўцоў, прадпрымальнікаў і дзяржавы?» — пацікавіўся Аляксандр Лукашэнка.
На яго думку, «ні ў чым не павінна быць страт — ні ў насычэнні таварамі ўнутранага рынку, ні ў забеспячэнні работай актыўнай часткі насельніцтва, ні ў паступленні падаткаў у бюджэт».
«Мы павінны выслухаць прадпрымальнікаў, якія ў іх прапановы па вырашэнні пастаўленых імі ж пытанняў, і па выніках абмеркавання павінны прыняць рашэнні з перспектывай гэтага віду бізнесу ў краіне», — падкрэсліў Прэзідэнт.
Пры гэтым ён акцэнтаваў увагу на тым, што ні ў якім разе нельга крыўдзіць людзей. «Чакаю сістэмнага даклада ад урада для прыняцця рашэння», — сказаў Аляксандр Лукашэнка.
Лукашэнка: пры вырашэнні праблем прадпрымальнікаў трэба дзейнічаць гібка і прымяняючы эканамічныя механізмы
«Шмат аб чым мы сёння ўжо гаварылі, у тым ліку з прадпрымальнікамі. У кожнага склаліся пэўныя настроі, — сказаў кіраўнік дзяржавы. — Але, на жаль, ужо 10 гадоў з зайздроснай рэгулярнасцю вяртаемся да работы прадпрымальнікаў. У мінулым годзе пасля разгляду гэтага пытання на нарадзе ў Прэзідэнта і дадатковага абмеркавання з прадпрымальнікамі быў прыняты ўказ нумар 222. У ім прадугледжвалася, што з 1 ліпеня 2014 года ўводзіцца правіла — дакументальна пацвярджаць набыццё рэалізуемай прадукцыі. Тады ж быў устаноўлены пераходны перыяд да 1 сакавіка 2015 года, каб даць магчымасць прадпрымальнікам рэалізаваць ужо ўвезеныя па старых правілах тавары. Гэта была іх просьба».
Аляксандр Лукашэнка падкрэсліў: яго інфармуюць, што за мінулы год палавіна прадпрымальнікаў здолела выканаць устаноўленыя дзяржавай патрабаванні і перайшла на празрыстыя метады работы. Аднак гэта зрабілі не ўсе. І цяпер яны просяць падоўжыць тэрмін продажу існуючых астаткаў тавараў, увезеных без дакументаў. «Тады прасілі распрадаць тое, што заляжалася, цяпер — тое ж самае. Пры гэтым спасылаюцца на складанасці з рэалізацыяй, дзеянні расійскіх прадаўцоў, якія не прадстаўляюць ім адпаведныя дакументы, на дарагоўлю, мізэрнасць асартыменту і нізкую якасць прадукцыі, якую можна набыць на айчынных аптовых складах, не выязджаючы за мяжу, — адзначыў Прэзідэнт. — Указваюць на тое, што нашы партнёры па Еўразійскім эканамічным саюзе не патрабуюць выканання сваімі індывідуальнымі прадпрымальнікамі аналагічных норм і тым самым ставяць беларусаў у няроўныя ўмовы».
Аляксандр Лукашэнка лічыць, што ўсе меркаванні павінны быць пачуты і ўлічаны.
Лукашэнка: з 1 студзеня 2016 года ўсе прадпрымальнікі будуць працаваць у аднолькавых умовах
«Больш адтэрміноўкі не будзе! І так робім вельмі вялікія адступленні», — сказаў кіраўнік дзяржавы, маючы на ўвазе гандаль індывідуальных прадпрымальнікаў без сертыфікатаў, якія пацвярджаюць якасць тавараў.
«Трэба ісці да цывілізаванай формы гандлю, — падкрэсліў Прэзідэнт. — Гэта ненармальна, калі мы без дакументаў сумкамі возім тавар. Гэта нават нас прыніжае».
«Без дакументаў у Беларусі ніхто працаваць не будзе! Усё роўна некалі трэба пераходзіць да гэтай цывілізацыі. Тым больш з маімі жорсткімі падыходамі», — дадаў Аляксандр Лукашэнка.
На думку Прэзідэнта, усе прадпрымальнікі ў краіне павінны працаваць у аднолькавых умовах. Аляксандр Лукашэнка прапанаваў індывідуальным прадпрымальнікам аб’яднацца і разам падумаць над тым, як яны маюць намер працаваць з будучага года ў такіх умовах. Кіраўнік дзяржавы адзначыў, што ў выпадку неабходнасці ім будзе аказана дапамога, у тым ліку крэдытнымі сродкамі Сусветнага банка, Банка развіцця.
Урад Беларусі прапануе механізмы плаўнага пераходу ІП да больш цывілізаваных форм работы
Гэтыя прапановы агучыў 17 сакавіка на нарадзе ў Прэзідэнта па пытаннях рэгулявання і развіцця асобных відаў прадпрымальніцкай дзейнасці першы віцэ-прэм’ер Беларусі Васіль Мацюшэўскі.
Урад сумесна з бізнес-супольнасцю распрацаваў дапаўненні і змяненні ва ўказ ад 16 мая 2014 года нумар 222 «Аб рэгуляванні прадпрымальніцкай дзейнасці і рэалізацыі тавараў індывідуальнымі прадпрымальнікамі і іншымі фізічнымі асобамі». Праектам дакумента прапануецца даць права індывідуальным прадпрымальнікам — плацельшчыкам адзінага падатку рэалізоўваць тавары без дакументаў, якія пацвярджаюць іх набыццё, з адначасовым павелічэннем ставак падатку. Таксама прадугледжваецца ўстанаўленне для замежных грамадзян закрытага пераліку тавараў, якія яны маюць права рэалізоўваць або прапаноўваць да продажу на рынках або іншых месцах, устаноўленых мясцовымі выканаўчымі і распарадчымі органамі. Такія меры прапануюцца для таго, каб ураўнаваць у правах замежных грамадзян і беларускіх, адзначыў першы віцэ-прэм’ер. «Гэта будзе садзейнічаць стварэнню аднолькавых умоў для рэалізацыі тавараў фізічнымі асобамі, якія не ажыццяўляюць прадпрымальніцкую дзейнасць», — сказаў Васіль Мацюшэўскі.
Ён звярнуў увагу, што ў той жа час у выпадку прадастаўлення права індывідуальным прадпрымальнікам — плацельшчыкам адзінага падатку ажыццяўляць рознічны гандаль таварамі без дакументаў, што пацвярджаюць іх набыццё, ствараюцца няроўныя канкурэнтныя ўмовы для айчынных вытворцаў аналагічных тавараў, а таксама суб’ектаў гаспадарання, якія ажыццяўляюць імпарт і рэалізацыю тавараў у адпаведнасці з устаноўленымі патрабаваннямі. «Каб не ствараць прэферэнцый для гандлю таварамі сумніўнай якасці, а самае галоўнае — згладзіць няроўныя ўмовы дзейнасці суб’ектаў гандлю, прапануецца для прадпрымальнікаў — плацельшчыкаў адзінага падатку павялічыць падатковую нагрузку на 50 працэнтаў, устанавіць для іх просты і зразумелы парадак выплаты ПДВ у фіксаванай суме ў памеры 4-кратнай стаўкі адзінага падатку і выплаты адзінага падатку», — сказаў Васіль Мацюшэўскі.
Пытанні неаднолькавых канкурэнтных умоў з беларускімі вытворцамі — афіцыйнымі імпарцёрамі прапануецца вырашыць эканамічнымі метадамі шляхам штогадовага паступовага павышэння падатковай нагрузкі: з 2016 года — павелічэнне ПДВ у фіксаванай суме да 5-кратнай стаўкі адзінага падатку, з 2017 года — да 6-кратнай стаўкі адзінага падатку.
«Такім чынам, прадпрымальнікі будуць загадзя ведаць правілы работы на бліжэйшую перспектыву, — лічыць Васіль Мацюшэўскі. — У цэлым прыняцце гэтых змяненняў і дапаўненняў будзе садзейнічаць павелічэнню падатковых паступленняў, стабілізацыі сітуацыі ў прадпрымальніцкім асяроддзі, забеспячэнню больш плаўнага пераходу індывідуальных прадпрымальнікаў на празрыстыя і цывілізаваныя формы работы».
Беларускія ІП змогуць прадаваць тавары легпрама без дакументаў да 1 студзеня 2016 года
Аб гэтым сёння па выніках нарады па пытаннях рэгулявання і развіцця асобных відаў прадпрымальніцкай дзейнасці паведаміў прэм’ер-міністр Беларусі Андрэй Кабякоў.
«Работа без дакументаў прадаўжаецца да 1 студзеня 2016 года. Пасля 1 студзеня 2016 года работа толькі па дакументах, — падкрэсліў Андрэй Кабякоў. — На працягу года роўнымі часткамі, за тры разы стаўка ПДВ будзе павышацца з 2 да 4». Што датычыцца дакументаў, якія пацвярджаюць якасць, то іх наяўнасць будзе абавязковая таксама з 1 студзеня 2016 года.
Андрэй Кабякоў падкрэсліў, што ўлады запрашаюць ІП да супрацоўніцтва і ў пытанні фарміравання асартыменту аптовых баз. У бліжэйшы час будуць вызначаны структуры, якія будуць займацца падрыхтоўкай і ўвозам аптовых партый тавараў. Урад і мясцовыя органы ўлады правядуць адпаведную работу, вывучаць попыт і арганізуюць нармальны ўвоз тавараў для рэалізацыі на аптовых базах, у магазінах-складах. «Так, каб гэтыя тавары былі з усімі дакументамі і самае галоўнае, каб яны былі вамі запатрабаваны», — сказаў прэм’ер-міністр, звяртаючыся да ІП. Меры, якія будуць прымацца для таго, каб тавары без дакументаў не рэалізоўваліся, стануць галоўнай перашкодай для кантрабанды, рэзюмаваў кіраўнік урада.