Учора, 16 красавіка, на брацкіх могілках у вёсцы Дворышча Сіроцінскага сельсавета прайшло перапахаванне астанкаў салдат, што загінулі ў гады Вялікай Айчыннай вайны, абараняючы сваю Радзіму ад ворага. Удзел ва ўрачыстасцях прымалі кіраўніцтва раёна, мясцовыя жыхары, вучні Слабадской школы, прадстаўнікі грамадскіх арганізацый, духавенства.
За апошнія 7 год у нашым раёне перапахаваны астанкі 38 воінаў, на жаль, вядомыя імёны толькі 9-ці з іх, гаварыў у сваім выступленні намеснік старшыні райвыканкама Анатоль Зайцаў.
Астанкі ваеннаслужачых былі знойдзены ў ходзе пошукавых работ сіламі прадстаўнікоў 52-га асобнага спецыялізаванага пошукавага батальёна на тэрыторыі Каўлякоўскага, Дабейскага і Сіроцінскага сельсаветаў. Ваенны камісар раёна Алег Чарняўскі выказаў удзячнасць Васілю Васільевічу Якаўлеву, на прысядзібным участку якога былі знойдзены астанкі трох ваеннаслужачых, у тым ліку і Аляксея Аляксандравіча Іванова, імя якога было ўстаноўлена па ўкладышу медальёна і нумарнога медаля “За адвагу”. Работы па ўвекавечанні ў раёне працягваюцца.
Любоў да радзімы – адно з галоўных прызначэнняў чалавека, упэўнены благачынны цэркваў Шумілінскай акругі протаіерэй Фёдар Пучынскі.
Салдат пахавалі згодна з хрысціянскімі традыцыямі і з усімі ваеннымі ўшанаваннямі. На магілу леглі вянкі і кветкі.
