Працаваць дзеля павышэння дабрабыту людзей
18 верасня адбыўся рэгіянальны сход дэпутатаў мясцовых Саветаў. Па выніках гэтай падзеі мы сустрэліся са старшынёй раённага Савета дэпутатаў Ірынай Мікалаеўнай Новікавай і папрасілі расказаць пра дзейнасць прадстаўнічай і выканаўчай улады па забеспячэнні дабрабыту жыхароў раёна.
– Такая падзея праходзіла ўпершыню, калі дэпутаты мясцовых Саветаў дэпутатаў усіх узроўняў, раённыя ўлады, старэйшыны населеных пунктаў, прадстаўнікі ўсіх арганізацый нашага раёна сабраліся, каб падвесці вынікі сацыяльна-эканамічнага развіцця раёна за прайшоўшую пяцігодку, вызначыць перспектывы развіцця Шумілінскага раёна на наступныя пяць гадоў.
У выніках пяцігодкі ёсць уклад кожнага жыхара раёна. За сухімі лічбамі і фактамі плённая праца цэлых калектываў, асобных работнікаў. Па выніках работы за 2011-2014 гады 8 працоўных калектываў (ПМК-70, ДРБУ-204, Шумілінскі раённы Дом рамёстваў, ААТ “Прыазёрны мір”, СФГ “Раднік”, аддзел культуры райвыканкама, Шумілінскі раённы аддзел па надзвычайных сітуацыях), 80 працаўнікоў раёна занесены на раённую Дошку гонару, 6 – прысвоена званне “Чалавек года Віцебшчыны”, 25-ці званне “Жанчына года Шуміліншчыны”, 19 чалавек узнагароджаны Ганаровымі граматамі Віцебскага аблвыканкама і абласнога Савета дэпутатаў, 225 – Ганаровымі граматамі райвыканкама і раённага Савета дэпутатаў.
– Асноўнай задачай сацыяльна-эканамічнага развіцця і краіны і раёна заўжды было паляпшэнне жыцця людзей, рашэнне паўсядзённых праблем, пытанняў жыццезабеспячэння насельніцтва. Што зроблена ў нашым раёне ў гэтым накірунку за 2011-2015 гады?
– Так, у цэнтры ўвагі ўлады заўсёды пытанні жыццезабеспячэння людзей. Менавіта на гэта накіравана дзейнасць усіх органаў улады, арганізацый і прадпрыемстваў раёна. Работа па рашэнні гэтых пытанняў будуецца на аснове ўзаемадзеяння органаў выканаўчай улады ўсіх ўзроўняў, раённых службаў, дэпутацкага корпусу, старэйшын. Штогод на сесіях раённага і сельскіх Саветаў дэпутатаў, пасяджэннях раённага і сельскіх выканаўчых камітэтаў, прэзідыума раённага Савета дэпутатаў разглядаюцца і прымаюцца рашэнні па ўдасканаленні работы па розных напрамках жыццядзейнасці. Раённым Саветам дэпутатаў штогод зацвярджаюцца і аналізуюцца прагнозныя паказчыкі сацыяльна-эканамічнага развіцця, тэрытарыяльныя праграмы, бюджэт.
Раённы бюджэт за 2011-2014 гады характарызуецца павелічэннем на 5,5% долі ўласных даходаў у агульным аб’ёме бюджэту, якая склала па выніках 2014 года 39,1%. У бюджэтах сельскіх Саветаў доля ўласных даходаў вырасла на 2,1% і склала 73,7%. Прымаемыя меры па выкананні прагнозных паказчыкаў па вытворчасці прадукцыі, стабілізацыі работы рэальнага сектара эканомікі, мабілізацыя дадатковых крыніц, захаванне падатковай дысцыпліны дазволілі прыцягнуць у бюджэт раёна за 2011-2014 гады звыш плана па даходах 35,1 млрд. рублёў, накіраваных на сацыяльна-эканамічнае развіццё раёна.
За прайшоўшы перыяд створаны ўмовы для рашэння пытанняў жыццезабеспячэння, атрыманы пэўныя вынікі ў розных сферах дзейнасці.
За 2011-прайшоўшы перыяд 2015 года пабудавана і ўведзена ў эксплуатацыю 22996 кв. метраў жылля: 108 дамоў і 314 кватэр, а гэта значыць, 422 сям’і атрымалі новае жыллё.
Праведзены капітальны рамонт, адкрыццё аб’ектаў сацыяльна-культурнай сферы, сярод якіх дзіцячая школа мастацтваў, праваслаўны храм у г. п. Обаль, гандлёвыя аб’екты, вядуцца работы па будаўніцтву праваслаўнага храма ў райцэнтры, капітальнаму рамонту ЦРБ, рэканструкцыя фізкультурна-аздараўленчага комплексу.
У раёне дэмаграфічная сітуацыя характарызуецца стабільнасцю па нараджальнасці і зніжэннем па смяротнасці: за 2011-8 месяцаў бягучага года нарадзілася 1002 дзіцяці (сёлета – 134), памерла 1809 (сёлета – 242). Натуральныя страты насельніцтва скараціліся з 255 чалавек у 2011 годзе да 154 чалавек у 2014. Галоўная задача на наступнае пяцігоддзе – стабілізацыя і рост колькасці насельніцтва раёна.
– За апошнія гады дзейнасць жыллёва-камунальнай гаспадаркі раёна значна пашырылася за кошт перадачы ёй жылля, інжынерных сетак і іншых аб’ектаў у сельскай мясцовасці. Як гэта паўплывала на якасць жыцця вяскоўцаў?
– Цяжка ўявіць, што яшчэ 5-7 гадоў таму ў сельскіх населеных пунктах усе вуліцы (за выключэннем транзітных), грамадзянскія могілкі, пад’езды да іх, грамадскія калодзежы, пераважная большасць сістэм водазабеспячэння і каналізацыі з’яўляліся безгаспадарнымі, не лічыліся на балансавым уліку.
За 2010-2011 гады праведзена інвентарызацыя шахтавых калодзежаў, яны пастаўлены на балансавы ўлік і абслугоўванне УП ЖКГ. У выніку 268 калодзежаў з 1215, што ёсць у раёне, прызнаны грамадскімі і перададзены на баланс камунальнай службы. Таксама на баланс УП ЖКГ перададзены 138,3 км вуліц і праездаў. Штогод на гэтыя мэты выдаткоўваюцца сродкі з бюджэту, зацвярджаецца пералік вуліц, якія падлягаюць рамонту. У 2011 годзе вырашана пытанне аб перадачы на баланс 151 пад’езду (63,8 км) да грамадзянскіх могілак. За 2011-2013 гады ўсе 169 сельскіх грамадзянскіх могілак перададзены на баланс УП ЖКГ.
Вызначэнне гаспадара для гэтых аб’ектаў дазволіла штогод вырашаць канкрэтныя праблемныя пытанні. Так, за 2014-2015 гады адрамантавана 18,12 км вуліц сельскіх населеных пунктаў, уладкавана 66 калодзежаў, адрамантаваны 242 воданапорныя калонкі, упарадкавана 86 могілак, устаноўлена агароджа на 4, адрамантавана на 33 могілках, праводзіцца планавае і па зваротах грамадзян выдаленне аварыйных дрэў і санітарная ачыстка могілак, грэйдзіраванне пад’ездаў да іх.
Пабудаваны і адрамантаваны артэзіянскія свідравіны ў Обалі, Полькавічах, Кардоне, Башнях, Лескавічах, пабудавана станцыя абезжалезвання вады ў Сіроціне, вядзецца капітальны і бягучы рамонт жыллёвага фонду, сістэм цепла-, водазабеспячэння і іншых.
Але наперадзе сур’ёзная работа па рашэнні шэрагу пытанняў жыццезабеспячэння людзей, звязаных з аказаннем жыллёва-камунальных паслуг. Патрабуецца рашэнне пытанняў з будаўніцтвам артэзіянскіх свідравін у Кардоне, Лескавічах, Гаравых, Башнях, Прыазёрнай, Мікалаеве, Мішневічах, Крывым Сяле і іншых, замена водаправодных сетак са 100% зносам, у тым ліку ў Мікалаеве, Мішневічах, Язвіне і ўчасткаў сетак у Шуміліне, Грудзінаве, Добрыне, замена ўчасткаў цепласетак у населеных пунктах раёна і іншае. Неабходна ліквідаваць адставанне па капітальным рамонце жыллёвага фонду. Трэба рашаць і шэраг іншых праблемных пытанняў.
– Увядзенне сістэмы сацыяльных стандартаў дазволіла палепшыць якасць паслуг не толькі ў жыллёва-камунальнай гаспадарцы. У якіх галінах у раёне найбольш паспяхова развіваюцца і ўдасканальваюцца паслугі для насельнітцва?
– Узровень і якасць жыцця людзей у раёне падтрымліваецца праз выкананне сацыяльных стандартаў ва ўсіх сферах і галінах.
Дзякуючы рэканструкцыі існуючых ліній сувязі і ўкараненню новых тэхналогій у раёне забяспечана магчымасць устаноўкі тэлефонаў ва ўсіх населеных пунктах, атрыманне паслугі шырокапалоснага доступу ў інтэрнэт ў населеных пунктах з колькасцю больш за 200 жыхароў (нарматыў 1,5 тысячы чалавек), забяспечана тэлефанізацыя ўсіх устаноў аховы здароўя і аптэк. Шумілінскаму вузлу электрасувязі трэба працягваць работы па замене нездавальняючых ліній сувязі, паляпшаць якасць паслуг, звярнуць увагу на задавальненне запытаў насельніцтва, у сувязі з пераходам да эфірнага вяшчання, слухаць раённае радыё.
Шырокі спектр паштовых і сучасных інфакамунікатыўных, фінансавых і іншых паслуг аказваюць аддзяленні паштовай сувязі. У рамках рэалізацыі рэспубліканскай праграмы развіцця паштовай сувязі 125 населеных пунктаў раёна пераведзены на матарызаваную дастаўку пошты. Участку паштовай сувязі трэба павялічваць аб’ёмы і павышаць якасць паслуг, ліквідаваць чэргі на цэнтральным паштовым аддзяленні.
Гандлёвае абслугоўванне раёна пашыраецца за кошт развіцця прыватных прадпрыемстваў. Цяпер гандлёвае абслугоўванне насельніцтва ажыццяўляюць 47 суб’ектаў гаспадарання, у тым ліку райспажыўтаварыства, 7 аўтамагазінаў якога абслугоўваюць жыхароў 187 сельскіх населеных пунктаў. Выязны гандаль ажыццяўляюць больш за 20 ІП, прыватныя прадпрыемствы “Залаты ярлык”, “Брут”, “Вітконпрадукт” і іншыя. За 2011-2015 гады адкрыта 5 новых крам, набыта аўтакрама, у гандлёвых прадпрыемствах з’явілася тэрміналы для безнаяўных плацяжоў.
У сферы бытавых паслуг працуюць 29 арганізацый, на камунальнае ўнітарнае прадпрыемства бытавога абслугоўвання насельніцтва прыходзіцца 36%.
Развіццё гандлёвага і бытавога абслугоўвання патрабуе вырашэння кадравага пытання, выкаранення негатыўных фактараў, звязаных з парушэннем рэжымаў работы, графікаў выязнога абслугоўвання, асартыменту і іншых праблемных пытанняў.
– Штогод населеныя пункты нашага раёна прыбываюць узорамі добраўпарадкавання. Немалую ролю ў гэтым адыгрываюць і старэйшыны населеных пунктаў. Каго б вы маглі адзначыць асабліва?
– Работа па добраўпарадкаванні вядзецца пры непасрэдным удзеле як прадпрыемстваў і арганізацый раёна, так і асобных грамадзян.
У мінулым годзе і сёлета асаблівая ўвага была ўдзелена месцам воінскай славы, брацкім могілкам савецкіх воінаў. За 2011-2015 гады на гэтыя мэты выдаткавана больш за 626 мільёнаў рублёў з бюджэту і сродкаў суботнікаў.
Рамонт і рэканструкцыя праведзена на воінскіх пахаваннях у Башнях, Мішневічах, Тропіне, Язвіне, Кардоне, Дворышчы, Падмішнеўі і іншых. Устаноўлены памятныя знакі Герою Савецкага Саюза А. С. Расказаву і разведчыкам 51-й стралковай дывізіі на чале з Г. Г. Шубіным у аграгарадку Мішневічы, лётчыку І. П. Посахаву ў аграгарадку Мікіціха, нашым землякам капітану Д. В. Мясаедаву і воіну-афганцу В. І. Угнявёнку ў г. п. Шуміліна.
У выніку работы па добраўпарадкаванні мяняецца аблічча райцэнтра, аграгарадкоў і вёсак: вядзецца асфальтаванне вуліц, будуюцца агароджы, пешаходныя дарожкі, месцы адпачынку, дзіцячыя пляцоўкі, з’яўляюцца кветнікі і дэкаратыўныя кампазіцыі. У якасці эталонаў добраўпарадкавання можна прывесці тэрыторыі раённай бібліятэкі, банкаў, Обальскай і Башнёўскай школ, ДРБУ-204, СШ №1, ДАЦ “Дружба” у Амбросавічах і многіх іншых.
Немалую ролю ў гэтай рабоце адыгрываюць старэйшыны, якія з’яўляюцца звязуючым звяном паміж уладай, рознымі службамі ў рашэнні пытанняў жыццезабеспячэння, добраўпарадкавання і іншых. Вопыт такіх старэйшын як Лялюга М. Ц. (вёска Лялюгі), Бубен А. М. (Дабея), Лазука Н. Л. (Вялікія Ляжні), Несцярэнка Л. С. (Пісарава, Войлавічы) Дабейскага сельсавета; Яцука В. П. (Гаравыя), Байковай Р. А. (Крывое Сяло), Пляшковай А. А. (Полькавічы), Карась Т. Д. (Яцукі) Каўлякоўскага сельсавета; Гатоўкінай Г. В. (Мазурына, Доўгая Ніва і Сідараўшчына), Жандаравай Л. М. (Залужжа) Лаўжанскага сельсавета; Зуевай С. П. (Мішневічы), Лузгіной Ж. А. (Казьяны) Мішневіцкага сельсавета; Лявонавай Е. С. (Сянькова), Апоркіна І. Я. (Зямцы, Тропіна), Сопат З. Ф. (Слабада) Сіроцінскага сельсавета; Гушчы М. У. (Бубалі), Кралько М. М. (Мікалаева), Барысевіч Л. К. (Кардон) Мікалаеўскага сельсавета; Бабковай Л. Х. (Хацілава, Засіннікі), Крысцінінай Л. К. (Дубраўскія, Полцева), Сафончык А. В. (Башні) Светласельскага сельсавета; Лаўрэнцьева В. У. (Лявонава, Соіна), Ніканавай Л. П. (Падоры), Абраменкі П. А. (Крупеніна) Обальскага сельсавета і многіх іншых заслугоўвае падзякі і прызнання.
– Асаблівасцю дзейнасці ўлады ў нашай краіне з’яўляецца тое, што яна трымае пастаянную сувязь з насельніцтвам. Напэўна, немалая роля ў гэтым прадстаўнічай улады, дэпутатаў, органаў грамадскага самакіравання?
– Непасрэдны ўдзел у рашэнні пытанняў сацыяльна-эканамічнага развіцця, правядзенні мерапрыемстваў грамадска-палітычнай значнасці прымаюць мясцовыя Саветы дэпутатаў: раённы (31 дэпутат) і 8 сельскіх (91 дэпутат). Створана і працуе сістэма органаў грамадскага самакіравання, якая складаецца са 136 старэйшын.
Дэпутаты і старэйшыны прадстаўляюць інтарэсы грамадзян усіх узроставых груп і сацыяльных слаёў, а гэта 18 521 жыхар раёна (па стану на 01.01.2015 г.), якія пражываюць у 237 населеных пунктах з 253, зарэгістраваных у раёне (у 14 сельскіх населеных пунктах насельніцтва не зарэгістравана і не пражывае).
Работа па вывучэнні праблемных пытанняў жыццезабеспячэння вядзецца ў непасрэдным кантакце з жыхарамі населеных пунктаў, работнікамі арганізацый і прадпрыемстваў праз сустрэчы па месцы працы і жыхарства, правядзенне сходаў і іншых мерапрыемстваў. Эфектыўнай формай работы з грамадзянамі зарэкамендавалі сабе дні работы з насельніцтвам, якія праводзяцца штомесячна на тэрыторыі асобнага сельсавета. Пытанні сацыяльнага характару, якія тычацца інтарэсаў многіх людзей, што паступаюць пры правядзенні дзён, рашаюцца, як правіла, аператыўна, што папярэджвае звароты грамадзян і стварае спрыяльны сацыяльны клімат.
Кіраўніцтвам раённага выканаўчага камітэта, раённага Савета дэпутатаў пастаянна праводзяцца асабістыя выязныя прыёмы грамадзян, “прамыя тэлефонныя лініі”. Так, толькі за 2014-2015 гады праведзены 91 прыём грамадзян, на якія паступіла 168 пытанняў, з якіх 159 вырашаны, 9 – на кантролі. За гэты перыяд праведзена 58 “прамых ліній”, паступіла 211 пытанняў ад 195 грамадзян, 200 пытанняў вырашаны, на кантролі – 7 пытанняў.
Іншага стаўлення да людзей і быць не можа. Як падкрэсліў Прэзідэнт Рэспублікі Беларусь А. Р. Лукашэнка: “Улада ў нашай краіне валодае вялізным і самым значным рэсурсам – крэдытам даверу людзей. І аддаваць яго штогод мы павінны усё з большымі працэнтамі. Гэта формула ўзаемаадносін, свайго роду сацыяльна-палітычны кантракт, павінна заставацца нязменнай”.
– Мы знаходзімся напярэдадні важнай палітычнай падзеі – выбараў Прэзідэнта Рэспублікі Беларусь. Гэта час, калі мы выбіраем не толькі кіраўніка, але і шляхі развіцця нашай дзяржавы, нашага грамадства. Чаго б вы пажадалі жыхарам Шумілінскага раёна?
– Аналіз сацыяльна-эканамічнага становішча раёна, рашэння пытанняў жыццезабеспячэння дазваляе адзначыць, што нягледзячы на тое, што дадзены перыяд з’яўляецца вельмі няпростым, маюцца эканамічныя і фінансавыя праблемы, для тых, хто можа і хоча працаваць, ёсць умовы, для сацыяльна неабароненых катэгорый – дзейнічае сістэма сацыяльнай абароны, для ўсіх грамадзян створаны ўмовы для спакойнага і бяспечнага жыцця.
Часовыя цяжкасці мы перажывём, не такое перажывалі. Галоўнае, што мы жывем у міры і згодзе, маем базавыя каштоўнасці як матэрыяльныя, так і духоўныя, перспектывы далейшага развіцця і паляпшэння дабрабыту людзей.
11 кастрычніка адбудуцца выбары Прэзідэнта Рэспублікі Беларусь – падзея значная для грамадзян нашай краіны. Нам трэба зрабіць асэнсаваны, адказны выбар. Чалавеку прыродай закладзена імкнуцца да стабільнасці, працвітання і дабрабыту, дзейнічаць на перспектыву, будаваць планы, верыць і спадзявацца на лепшае. Кожны з нас разумее, што ад нашай актыўнасці залежыць тое, якім будзе будучае кожнага з нас і краіны ў цэлым. Усе мы адказныя за сацыяльна-эканамічнае, духоўнае, культурнае развіццё нашага грамадства, нашай дзяржавы. У нашых сілах і магчымасцях змяніць у лепшы бок многія аспекты жыцця, рашыць пытанні і праблемы, якія ўзнікаюць у жыцці, павысіць наш дабрабыт.
Упэўнена, што прыйшоўшы 11 кастрычніка на выбарчыя ўчасткі, вы прагаласуеце за дастойнага кандыдата ў Прэзідэнты, кандыдата, якому вы давяраеце, якога вы ведаеце па справах і ўчынках, які сваёй працай і грамадзянскай пазіцыяй не аднойчы даказаў сваю адданасць нашай краіне.
Ад нашага выбару залежыць будучае, мір і стабільнасць у грамадстве, жыццё наша і нашых дзяцей і блізкіх.
Размаўляў Сяргей ЕРМАЛАЕЎ.
Надрукавана ў № 76 ад 29.09.2015 г.