Па фінскай тэхналогіі
Амаль 50 тысяч маладых елачак па новай тэхналогіі высадзяць сёлета работнікі Шумілінскага лясгаса.
“У лясным масіве Шумілінскага лясніцтва адвялі 20 гектараў для маленькіх елачак, – расказаў інжынер па лесааднаўленні лясгаса Д. П. Раманенка. – Саджанцы, вырашчаныя з закрытай каранёвай сістэмай, высаджваем у лес упершыню. Спадзяемся, прыжывуцца добра. Калегі з іншых лясгасаў, якія раней пачалі займацца фінскай тэхналогіяй, сцвярджаюць, што саджанцы больш моцныя і патрэба ў доглядзе за імі меншая”.
Насенне дрэў у спецыяльныя кантэйнеры высяваюць у Шчучынскім рэспубліканскім насенняводчым цэнтры. Маленькія саджанцы прывозяць у Шуміліна і вырошчваюць два гады.
Як расказаў дырэктар Шумілінскага лясгаса І. Я. Папок, у цяпліцах прадпрыемства расце больш за сто тысяч саджанцаў. У асноўным гэта елкі – 83,5 тысячы аднагадовых елачак будуць высаджваць у лясы толькі ў наступным годзе.
Дбаюць тут і пра будучыя пасадкі – на днях прывязуць са Шчучына яшчэ больш за сто тысяч штук маленькіх елачак. На думку спецыялістаў лясгаса, за вырошчваннем саджанцаў з закрытай каранёвай сістэмай будучыня. З гэтага года ў кожнай вобласці рэспублікі будуць створаны лініі па сяўбе і вырошчванні пасадачнага матэрыялу з закрытай каранёвай сістэмай. У прыватнасці, на Віцебшчыне такая лінія будзе пабудавана ў Глыбокім.
Ёсць у цяпліцах лясгаса і пасадачны матэрыял дэкаратыўных кустоў і дрэў: туі розных парод, вербы, спірэі, ядлоўцы. Па словах работнікаў лясгаса, іх з ахвотай купляюць жыхары раёна, добра разыходзяцца яны падчас кірмашоў у Віцебску.
Ларыса КІСЯЛЁВА.
Надрукавана ў №31 ад 19.04.2016 г.
