Армія сказала “Трэба”
На мінулым тыдні адбылося пасяджэнне прэзідыума раённага Савета дэпутатаў, на якім было разгледжана пытанне аб рабоце па выкананні Закона Рэспублікі Беларусь “Аб усеагульным воінскім абавязку і ваеннай службе”.
“На тэрыторыі Шуміліншчыны праводзіцца мэтанакіраваная работа па рэалізацыі Закона, – адзначыла старшыня райсавета дэпутатаў Ірына Мікалаеўна Новікава. – Аднак ёсць пэўныя пытанні, якія патрабуюць удакладнення і ўдасканалення”.
З асноўным дакладам выступіў падпалкоўнік А. М. Собін, начальнік адасобленай групы Шумілінскага раёна ваеннага камісарыята Бешанковіцкага і Шумілінскага раёнаў Віцебскай вобласці, які расказаў, што воінскі ўлік прызыўнікоў і ваеннаабавязаных вядзецца згодна з патрабаваннямі Закона. Прызыў грамадзян на тэрміновую ваенную службу, службу ў рэзерве праводзіцца ў тэрміны, вызначаныя Указам Прэзідэнта.
У абмеркаванні пытання прынялі актыўны ўдзел галоўны ўрач Шумілінскай цэнтральнай раённай бальніцы К. Ф. Баканаў, начальнік аддзела адукацыі, спорту і турызму райвыканкама В. В. Мянькова, начальнік РАУС А. Р. Дзмітрэнка, са слушнымі прапановамі і дапаўненнямі выступіў член прэзідыума, дэпутат раённага Савета дэпутатаў, дырэктар ПМК-70 А. Ю. Крыўко.
На пасяджэнні падрабязна прааналізавалі, якім чынам у нашым раёне адбываецца прызыў і праходжанне службы ў рэзерве, прызыў на ваенныя і спецыяльныя зборы і іх праходжанне.
Як заўважыла І. М. Новікава, падводзячы вынікі абмеркавання, патрабуе сур’ёзнага ўдасканалення работа па ваенна-патрыятычным выхаванні моладзі, прапагандзе прэстыжу службы ва Узброеных Сілах. Служыць у арміі павінна быць ганарова, пачэсна і модна.
На пасяджэнні прэзідыума таксама было разгледжана пытанне “Аб эфектыўнасці работы з насельніцтвам органаў мясцовага кіравання і самакіравання на тэрыторыі Каўлякоўскага сельсавета”. Са справаздачай выступіла старшыня Каўлякоўскага сельвыканкама Т. А. Дзятлава.
Па абмеркаваных пытаннях прыняты адпаведныя пастановы.
Алена КАРПУШЭНКА.
Надрукавана ў №95 ад 06.12.2016 г.
