Чатыры пытанні пракурорам
Асноўнымі задачамі пракуратуры з’яўляюцца забеспячэнне права, законнасці і правапарадку, абарона правоў і законных інтарэсаў грамадзян і арганізацый, а таксама грамадскіх і дзяржаўных інтарэсаў. Пракуратура Шумілінскага раёна – гэта пракурор раёна Сяргей Зайцаў, намеснік пракурора Андрэй Дзергачоў і памочнік пракурора Наталля Гаўрылюк. Напярэдадні прафесійнага свята – Дня работнікаў пракуратуры – мы задалі некалькі пытанняў пракурорскім работнікам.
– Скажыце, чаму вы сталі менавіта пракурорскім работнікам?
С.З.: На мой выбар паўплывала маці, яна была настаўніцай беларускай мовы і літаратуры. Яна і бачыла мяне пракурорам, неаднойчы казала, што слова “пракуратура” ў перакладзе абазначае “клопат”. Менавіта таму пасля заканчэння школы і паступіў на юрыдычны факультэт БДУ.
А.Д.: Вызначыўся, што дакладна буду пракурорскім работнікам, на апошніх курсах вучобы ў ВДУ імя П. М. Машэрава. Што паўплывала на мой выбар? Відаць, на той момант зацікавіла работа пракурора ў якасці дзяржаўнага абвінаваўцы ў судовым пасяджэнні, тут трэба не толькі дасканала ведаць законы, а і ўмець сваю пазіцыю даказаць, абгрунтаваць.
Н.Г.: Са школы марыла стаць следчым. Зачытвалася дэтэктыўнымі раманамі, асабліва даспадобы была Агата Крысці з яе легендарным дэтэктывам Эркюлем Пуаро. Праўда, на апошнім курсе Акадэміі кіравання пры Прэзідэнце Рэспублікі Беларусь цвёрда вырашыла, што пайду ў пракуратуру.
– Якімі якасцямі павінен валодаць пракурорскі работнік?
На гэта пытанне ўсе трое адказалі практычна аднолькава: “Павінен быць высокакваліфікаваным граматным спецыялістам. Сумленным і справядлівым. І, самае галоўнае, прыстойным чалавекам”.
– Раскажыце, якім быў гэты год работы ў пракуратуры?
С. З.: Як звычайна, вельмі насычаным. Не хочацца напярэдадні прафесійнага свята “загружаць” чытачоў шматлікімі лічбамі. Так што спынюся толькі на адным аспекце. Лічу, што пракуратуры раёна ўдалося скаардынаваць работу ўсіх зацікаўленых структур па прафілактыцы і зніжэнні ўзроўню злачыннасці ў раёне. Так, за апошнія чатыры месяцы зніжэнне злачыннасці склала 5%.
А. Д.: Пракуратурай раёна шмат увагі ўдзяляецца праблеме сямейнага насілля. Так, за апошні год мы ініцыявалі ўзбуджэнне дзвюх крымінальных спраў па такіх фактах.
Н. Г.: Зроблена вялізарная работа па Дэкрэце №18. Летась судовым рашэннем было пазбаўлена бацькоўскіх правоў 8 чалавек, а у 2016 – 11. Работа, на мой погляд, вядзецца ў правільным накірунку.
– Чым любіце займацца ў вольны час?
С. З.: Вольнага часу, на жаль, практычна няма. Вельмі люблю чытаць. Апошнія гадоў дзесяць “падсеў” на літаратурныя часопісы “Наш современник”, “Москва” і “Молодая гвардия”. Люблю пагартаць і класіку. З лірыкаў падабаецца Сяргей Ясенін, з празаікаў – Леў Талстой. Не супраць і фізічных нагрузак: басейн, настольны тэніс і веласіпед.
А. Д.: Мне даспадобы актыўны адпачынак. З сябрамі заўсёды рады пабегаць у міні-футбол. А яшчэ люблю парыбаліць. Для мяне важны сам працэс рыбалкі, а не ўлоў.
Н. Г.: Падабаецца чытаць кнігі. Толькі не дэтэктывы – іх хапае на рабоце. У кампаніі сяброў магу ўзяць у рукі гітару і паспяваць. Ды і тэлевізар не супраць паглядзець, асабліва калі там біятлонная трансляцыя.
Аляксандр ШЭДЗЬКО.
Надрукавана ў №49 ад 26.06.2018 г.
