Супрацоўнікі Дзяржаўтаінспекцыі РАУС правялі прафілактычную акцыю «Захавай сабе жыццё»

Як  рэальна захаваць жыццё пешаходам, веласіпедыстам, возчыкам гужавых павозак, вадзіцелям і пасажырам – пра гэта інспектары дарожна-патрульнай службы вялі размову з удзельнікамі дарожнага руху падчас акцыі. Дзеля гэтага трэба быць уважлівымі на дарогах, прышпільвацца рамянямі бяспекі, садзіцца за руль транспартнага сродку толькі з правамі адпаведнай катэгорыі і ўвогуле захоўваць правілы дарожнага руху, кажа начальнік ДАІ Мікалай Гаралевіч пасля чарговага рэйду, які быў праведзены па маршруце Мішкавічы-Кардон. У Мішкавічах былі выяўлены трое вадзіцеляў і адзін пасажыр, якія не былі прышпілены рамянямі бяспекі. Вадзіцелям пагражае штраф да 1 БВ, пасажырам – да  3 БВ. Адзін вадзіцель ехаў на легкавушцы, пры гэтым не меў правоў, за што заплаціць штраф да 20 БВ.

У рамках прафілактычнай акцыі супрацоўнікі ДАІ правялі мерапрыемства ў Кардонскай школе «Жыццё ў далоні». Былі падрыхтаваны конкурсы, загадкі, віктарыны, падчас якіх праверылі веды школьнікаў па правілах дарожнага руху. Супрацоўнікі міліцыі адказалі на пытанні школьнікаў і педагогаў,  уручылі ўсім дзецям флікеры.

Ларыса ЗАЙЦАВА.

Апублікавана ў №87 ад 06.11.2019 г.