Феерверк дзіцячых усмешак
Калі яшчэ здарацца цудам, як не на Каляды? Толькі вельмі важна, каб знайшліся добрыя, чулыя, неабыякавыя дарослыя, гатовыя падзяліцца цеплынёй сваіх сэрцаў з дзеткамі. Тады можа атрымацца такое светлае, шчырае свята, якое прайшло 7 студзеня ў СШ № 1. Амаль 30 хлопчыкаў і дзяўчынак з апякунскіх сем’яў, прытулка сацыяльна-педагагічнага цэнтра, дзіцячага дома сямейнага тыпу атрымалі ў гэты дзень падарункі і безліч станоўчых уражанняў.
– Калі мы задумвалі свята, то вельмі спадзяваліся на дапамогу нераўнадушных людзей, і такіх аказалася вельмі шмат, – прызналася адзін з арганізатараў мерапрыемства індывідуальны прадпрымальнік Святлана Сталярова. – Мне здаецца, у нас усё атрымалася. Галоўны крытэрый – феерверк дзіцячых усмешак, іх шчаслівыя вочы. Дзеля гэтага ўсё і задумвалася.
Акрамя канцэртнай праграмы ўдзельнікам прапанавалі цікавыя майстар-класы, латарэі, шматлікія конкурсы. Дзяўчынкі з задавальненнем плялі сабе мудрагелістыя коскі, а на аквагрым, які рабіла Анастасія Малашонак, прафсаюзны лідар лясгаса, чарга не заканчвалася да самага вечара.
– Хіба магчыма дзіцячае свята без цукерак і падарункаў, – кажа ідэйны натхняльнік мерапрыемства Вольга Коцікава. – Мы вельмі ўдзячныя Аляксандру Казлоўскаму, Дзмітрыю Карасю, Віалеце Чаплінскай і Таццяне Зубаравай, Дар’і Сіняковай і іншым індывідуальным прадпрымальнікам, якія выступілі спонсарамі свята.
Дарэчы, Вольга Коцікава не толькі вырашала шматлікія арганізацыйныя пытанні, але і выходзіла на сцэну ў якасці артыста. Прадстаўленне атрымалася не толькі яркае і вясёлае, але і пазнавальнае. Пробашч парафіі Маці Божай Фацімскай Анджэй Юхневіч разам з валанцёрамі раскрыў дзецям таямніцу нараджэння Ісуса Хрыста, запрасіў кожнага паўдзельнічаць у дзеі на сцэне.
А наогул, усяго было. Воўк скраў маленькую прыгажуню, а дзеці дапамагалі яе выратаваць. Сваімі выступленнямі гасцей радавалі ўдзельнікі танцавальнага калектыву “Вясёлка”, аб’яднання па інтарэсах вавінам в’ет во дао (РЦДМ), баянны аркестр дзіцячай школы мастацтваў і іншыя.
– Вельмі хочацца падзякаваць усім, хто дапамог стварыць дзецям свята, – кажа Святлана Сталярова. – Гэта і Людміла Дубоўская, Яўгенія Языкова, Анастасія Намеснікава, студыя святаў “Улыбакі Corporation” і іншыя. Больш за 30 падарункаў для дзяцей набылі бацькі ўдзельнікаў аб’яднання па інтарэсах вавінам в’ет во дао разам з яго кіраўніком Святланай Бараноўскай.
Завяршылася мерапрыемства салодкімі пачастункамі і шоу мыльных пузыроў.
Наталля ЧАРНІЧЭНКА.
Апублікавана ў №2 ад 10.01.2020 г.
