«50 год, як адно імгненне»
Кіраўнік фальклорнага калектыву «Гульбічы» Ларыса Цыркунова адзначыла 50-годдзе творчай дзейнасці.
Вечар-партрэт «50 год, як адно імгненне», які быў арганізаваны з гэтай нагоды, пачаўся з успамінаў. У 70-я гады мінулага стагоддзя Ларыса Цыркунова прыехала працаваць у наш раён пасля заканчэння Магілёўскага культасветвучылішча. Рэжысёр народнага тэатра Генадзь Ганчароў прапанаваў ёй паўдзельнічаць у спектаклі «Вяселле на Шуміліншчыне». Ларыса актыўна ўключылася ў работу па зборы абрадаў, песень, традыцый нашага краю. Вынікам карпатлівай працы стаў фальклорны спектакль у дзвюх дзеях: «Вяселле ў жаніха» і «Вяселле ў нявесты».
З гэтага часу Ларыса Іванаўна літаральна ўлюбілася ў фальклор Шуміліншчыны, пачала яго збіраць і актыўна прапагандаваць. Праз некаторы час з’явіліся новыя пастаноўкі – «Каляды», «Як кум да кумы заляцаўся», «Спара-дзіла Чачотачка сямёра дачок» і іншыя.
Пасля ўхода Генадзя Ганчарова, Ларыса Цыркунова з калектывам працягвае працаваць на прынцыпах фальклорнага тэатра. У 1994 годзе «Гульбічы» атрымліваюць званне «народны». Калектыў радуе гледачоў і сёння. Яго рэпертуар багаты і разнастайны. Фальклорныя кампазіцыі «На прызьбе», «Кірмашовыя замалёўкі», «Было ў цешчы сямёра зяцёў», «Мамачка, прыйшоў Сярожа» добра ведаюць і любяць гледачы. «Гульбічы» па праву можна назваць адной з культурных візітак Шуміліншчыны, калектыў паспяхова выступаў на сцэнах Расіі, Польшчы, Літвы і Латвіі.
Зразумела, гэта поспех не толькі кіраўніка Ларысы Цыркуновай, акампаніятара Анатоля Міхеева, балетмайстра Святланы Дземідзенкі, а і ўсяго калектыву. Відавочна, што вечар не мог прайсці без іх удзелу. «Гульбічы» падарылі імправізаваныя прыпеўкі, Анатоль Міхееў – аўтарскую пераапрацоўку песні. Наогул, песень на вечарыне было шмат.
Кожны, хто віншаваў Ларысу Іванаўну, рабіў гэта творча , з агеньчыкам, кожнае слова было шчырым. Многім Ларыса Іванаўна дала пуцёўку ў творчасць, заразіла інтарэсам да фальклору. Дырэктар Раённага цэнтра культуры Марына Прохарава выказала юбіляру цёплыя словы-віншаванні, пажадала творчага даўгалецця: «Вы патрэбны і гледачу, і нам, работнікам культуры. Такую любоў і прызнанне заслужыць вельмі няпроста. Дзякуй вам, Ларыса Іванаўна, за вашу творчасць, за ваша майстэрства, за вашу чалавечнасць».
Аляксандр ШЭДЗЬКО.
