Да тысячы тон за дзень
Па раёне на палеткі трэба вывезці больш за 164 тысячы тон арганічных ўгнаенняў. На 24 лютага вывезена каля 60%.
“Асноўны памочнік у вывазе арганікі – прадпрыемства меліярацыйных сістэм, – расказвае першы намеснік старшыні райвыканкама, начальнік райсельгасхарчу В. В. Родзіч. – Работу арганізавалі добра, дапамагаюць многім гаспадаркам раёна.”
У гэтым мы ўпэўніліся, калі на мінулым тыдні пабывалі на ферме Цаўі. Гружаныя трактары адзін за адным ад’язджалі ад фермы. Тут жа працавалі механізатары на экскаватары і бульдозеры. “Дапамагалі вывозіць гной ад жывёлагадоўчага комплексу, яшчэ адно наша звяно па вывазцы арганікі працуе ля фермы Рашэтнікі, – расказала прараб прадпрыемства В. І. Спірыдава. – Механізатары стараюцца. Хутка вызвалім пляцоўку ад гною, спяшаемся “ўхапіць” работу, пакуль “падэшва” на палях не адстаяла”.
Акрамя ААТ “Лаўжанскае”, меліяратары дапамагаюць “Сіроцінскаму”. На ферме Сіроціна працуе адзін з лепшых экскаватаршчыкаў прадпрыемства Р. Б. Волкаў. Ён вызваліў праходы ад гноевых гор, расчысціў дарогу. Цяпер без праблем можна пад’ехаць да гноетранспарцёра. І каля фермы Сіроціна, дзе некалькі гадоў не вывозілі гной, нарэшце пасвятлела.
Прадпрыемства меліярацыйных сістэм працуе на вывазцы арганікі два тыдні. Даведзены план у 21 тысячу тон выканалі напалову, расказаў галоўны інжынер прадпрыемства А. М. Лакціёнаў. “Усяго задзейнічалі 8 МТЗ, 3 экскаватары і 2 бульдозеры, – удакладняе Аляксандр Мікалаевіч. – За дзень вывозім да тысячы тон гною. Практычна ўсе механізатары перавыконваюць даведзеную дзённую норму”.
Заахвоціць меліяратараў стараюцца і маральна: штодзень выпускаюць баявыя лісткі, дзе запісваюць, хто колькі арганікі перавёз. Сярод механізатараў на першым месцы Канстанцін Дудараў, на яго рахунку ўжо амаль дзве тысячы тон арганікі. А за дзень на МТЗ ён перавозіць па 150-200 тон. На экскаватары добра працуе Пётр Чарнічэнка – за дзень паспявае адгрузіць каля сямісот тон гною.
Па словах А. М. Лакціёнава, прадпрыемства дапаможа і “Ульскаму”. У гэтай гаспадарцы будуць ратаваць ад гною ферму Кардон.
Ларыса КІСЯЛЁВА.
Надрукавана ў №17 ад 28.02.2012 г.