Адкуль будзе прыбытак, калі больш трацяць, чым зарабляюць?
Справаздачны сход ва УП “Шумілінскі райаграсэрвіс” прымусіў увесь калектыў прадпрыемства задумацца над тымі праблемамі, якія існуюць сёння, над тым, як узняць эканоміку, а разам з тым і заробках.
Магчыма, у паўсядзённай рабоце і не задумваешся, як спрацаваў, дадаў плюс ці мінус. Але калі на сходзе в. а. дырэктара ўнітарнага прадпрыемства В. В. Масько агучыў лічбы, параўнаў іх з раённымі вынікамі, многім, напэўна, стала сорамна за сваю работу.
Летась па валавому збору зерня – замест запланаваных 11500 тон атрымалі ўсяго 6355 тон. Ёсць прабелы і ў жывёлагадоўлі. І надоі, і прывагі жадаюць быць лепшымі.
Хаця за мінулы год прадпрыемства мае прыбытак больш за два мільярды, узровень рэнтабельнасці склаў 19,8%. Але такія вынікі атрымалі толькі дзякуючы дзяржаўнай падтрымцы. Дзяржава выдзяляла грошы на рамонт тэхнікі, на ўгнаенні, на вапнаванне, на навядзенне парадку на палетках. Калі ж адкінуць усе гэтыя дапамогі, то атрымаецца мізэрная рэнтабельнасць, падкрэсліў Вячаслаў Васільевіч. Дык адкуль жа будзе добры заробак, калі прадпрыемства болей траціць грошай, чым зарабляе?
Гэтую ж думку агучыла ў сваім дакладзе галоўны бухгалтар прадпрыемства В. І. Бароўка. Каб прадпрыемству выжыць, трэба глядзець далёка наперад і думаць пра будучае, зрабіла сваю выснову Вера Іванаўна. А для гэтага трэба развіваць вытворчасць, дабівацца зніжэння затрат, павялічваць аб’ёмы прадукцыі. І калі ў жывёлагадоўлі справы ладзяцца не вельмі, то варта развіваць іншую вытворчасць. Умовы ў райаграсэрвісе ёсць. Напрыклад, той жа дрэваапрацоўчы цэх, дзе вырабляюць піламатэрыялы, аказваюць паслугі насельніцтву, выконваюць рамонтна-будаўнічыя работы. Але за мінулы год і тут знізілі аб’ёмы вытворчасці, яны склалі ўсяго 66,7% да ўзроўню папярэдняга года.
Аб выніках работы райаграсэрвісу і раёна ў цэлым гаварыў і першы намеснік старшыні райвыканкама, начальнік райсельгасхарчу В. В. Родзіч. Віктар Віктаравіч параіў скарэкціраваць бізнэс-план на гэты год, узгадніць яго з упраўленнем райсельгасхарчу, каб не атрымалася так, што планы па надоях і прывагах, па ўраджайнасці зерневых ніжэй сярэдне-раённых.
Звярталася ўвага і на развіццё жывёлагадоўлі. У “Шумілінскім райаграсэрвісе” не хапае памяшканняў для размяшчэння цялушак. Ёсць каго карміць, але недзе і некаму, не вытрымліваюцца элементарныя тэхналогіі – звярнуў увагу Віктар Віктаравіч.
Трэба адзначыць, што жывёлаводы прадпрыемства не былі раўнадушнымі да ўзнятых праблем, задавалі пытанні начальніку райсельгасхарчу наконт кармлення і ўтрымання жывёлы, наконт будаўніцтва новых фермаў. Віктар Віктаравіч кампетэнтна адказаў на ўсе пытанні.
У гэтым годзе два памяшканні на ферме ў Светласельскім і ферму Баёўка чакае рэканструкцыя, у будучым кароў мяркуюць размяшчаць пераважна на буйных фермах, а на маленькіх будуць знаходзіцца толькі цяляты.
Напрыканцы справаздачнага сходу старшыня прафсаюзнага камітэта “Шумілінскага райаграсэрвісу” В. А. Клюева расказала пра выкананне калектыўнага дагавора ў мінулым го-дзе, пра сацыяльныя гарантыі і льготы, якія прадастаўляюцца работнікам прадпрыемства.
Ларыса ЗАЙЦАВА.
Надрукавана ў №19 ад 06.03.2012 г.