Навічкі на ўборцы
Жніво ў ААТ «АграБаравінка» пачалося з уборкі крыжакветных. З 49 гектараў свірэпіцы намалацілі амаль 37 тон і прыступілі да ўборкі рапсу.
На язвінскіх палетках сустракаемся з маладым экіпажам у складзе Аляксея Сідарава і Радзівона Стральцова. Яны абодва сёлета ўпершыню працуюць на камбайне. Аляксей, які раней рупіўся ў вытворчым цэху ААТ «Малако», сёлета ў цэнтры падрыхтоўкі, павышэння кваліфікацыі і перападрыхтоўкі рабочых райсельгасхарчу атрымаў правы на «Амкадор» і зернеўборачны камбайн – на ўсялякі выпадак. Дырэктар ААТ «АграБаравінка» Мікалай Рыбікаў пераманіў Аляксея Сідарава, які жыве ў Башнях, працаваць у сельгаспрадпрыемства. Аляксей калісьці рупіўся памочнікам у свайго бацькі. А вось самастойна сеў за штурвал першы раз. Кажа, што неацэнныя веды, атрыманыя ад выкладчыкаў цэнтра падрыхтоўкі, дзе вучыўся. Разам з гэтым раіцца з больш вопытнымі механізатарамі, напрыклад, Сяргеем Гоманавым, які таксама ўбірае рапс.
«Мы абодва навічкі на камбайне, – усміхаецца калега Аляксея Радзівон Стральцоў. – Я родам з Башнёў, сёлета закончыў сельскагаспадарчы каледж у пасёлку Акцябрскі, дзе вывучыўся на механізатара і слесара. Працаваць на камбайне мне вельмі цікава. Разам многаму вучымся, бо ведаць адну тэорыю для работы – мала. Трэба практычна авалодваць ведамі».
У «АграБаравінцы» трэба ўбіраць 80 гектараў рапсу. Вядома, Сяргей Гоманаў абышоў экіпаж навічкоў. Але вопыт, як вядома, прыходзіць не адразу.
Ларыса ЗАЙЦАВА.
